അരുവിത്തുറ: പ്രസിദ്ധ തീര്‍ഥാടനകേന്ദ്രമായ അരുവിത്തുറ സെന്‍റ് ജോര്‍ജ് ഫൊറോന പള്ളിയില്‍ വിശുദ്ധ ഗീവര്‍ഗീസ് സഹദായുടെ തിരുനാളിന് കൊടിയേറി. ദീപാലംകൃതമായ പള്ളിയുടെ മുമ്പില്‍ പ്രാര്‍ഥനാമഞ്ജരികളും സ്തുതിഗീതങ്ങളും നിറഞ്ഞ സായാഹ്നത്തില്‍ വികാരി ഫാ. സെബാസ്റ്റ്യന്‍ വെട്ടുകല്ലേല്‍ കൊടിയേറ്റുകര്‍മം നിര്‍വഹിച്ചു.
കൊടിയേറ്റിനു ശേഷം ഫാ. തോമസ് തയ്യിലിന്‍റെയും ഫാ. മാത്യു വെണ്ണായിപ്പിള്ളിലിന്‍റെയും കാര്‍മികത്വത്തില്‍ പുറത്തുനമസ്‌കാരം നടന്നു. തുടര്‍ന്ന് ഇടവക ജനങ്ങളും തൊട്ടടുത്ത ഇടവകകളിലെ വിശ്വാസികളും ചേര്‍ന്ന് വടക്കേക്കര കുരിശുപള്ളിയിലേക്ക് 101 പൊന്‍കുരിശുകളുമായി നടത്തിയ നഗരപ്രദക്ഷിണം വിശ്വാസ പ്രഘോഷണത്തിന്‍റെയും മതസൗഹാര്‍ദതയുടെയും പ്രതീകമായി. ആയിരക്കണക്കിനു വിശ്വാസികള്‍ നഗരപ്രദക്ഷിണത്തില്‍ പങ്കെടുത്തു.
വികാരി ഫാ. സെബാസ്റ്റ്യന്‍ വെട്ടുകല്ലേല്‍, അസിസ്റ്റന്‍റ് വികാരിമാരായ ഫാ. ജോയല്‍ പണ്ടാരപ്പറമ്പില്‍, ഫാ. ജോസഫ് കദളിയില്‍, ഫാ. ഫ്രാന്‍സിസ് മാട്ടേല്‍, ഫാ. ഏബ്രഹാം കുഴിമുള്ളില്‍, ഫാ. ബിജു കുന്നക്കാട്ട്, കൈക്കാരന്മാരായ തോമസ് കുന്നയ്ക്കാട്ട്, ജോസുകുട്ടി കരോട്ടുപുള്ളോലില്‍, പ്രിന്‍സ് പോര്‍ക്കാട്ടില്‍, ടോം പെരുനിലം, ജനറല്‍ കണ്‍വീനര്‍ അരുണ്‍ താഴത്തുപറമ്പില്‍, ഡോ. റെജി വര്‍ഗീസ് മേക്കാടന്‍, ചാക്കോച്ചന്‍ പ്ലാത്തോട്ടം, ജോജി തടിക്കല്‍, ജോര്‍ജ് മൂഴിയാങ്കല്‍, ജോസ് വയമ്പോത്തനാല്‍, ഡെന്നീസ് മേക്കാട്ട്, സാബു പ്ലാത്തോട്ടം, ജോണ്‍സണ്‍ ചെറുവള്ളില്‍, പാരിഷ് കമ്മിറ്റി അംഗങ്ങള്‍ തുടങ്ങിയവര്‍ നേതൃത്വം നല്‍കി.
ഇന്നു രാവിലെ 9.30 ന് തിരുസ്വരൂപ പ്രതിഷ്ഠ. 10 ന് ബിഷപ് മാര്‍ ജോസഫ് കല്ലറങ്ങാട്ട് സുറിയാനി കുര്‍ബാനയും വൈകുന്നേരം 4.30 ന് സീറോ മലബാര്‍ സഭ കൂരിയ ബിഷപ് മാര്‍ സെബാസ്റ്റ്യന്‍ വാണിയപ്പുരയ്ക്കല്‍ വിശുദ്ധ കുര്‍ബാനയും അര്‍പ്പിക്കും. ആറിനു തിരുനാള്‍ പ്രദക്ഷിണം.