തരംഗമായി തരൂർ
തിരുവനന്തപുരം: തെരഞ്ഞെടുപ്പിന് ഇനി ദിവസങ്ങൾ മാത്രം ബാക്കി നിൽക്കെ തിരുവനന്തപുരത്തെ യുഡിഎഫ് സ്ഥാനാർഥി ശശി തരൂർ ഇന്നലെ വട്ടിയൂർക്കാവ് നിയോജക മണ്ഡലത്തിലാണ് തെരഞ്ഞെടുപ്പ് പര്യടനം നടത്തിയത്.
മുളവന ജംഗ്ഷനിൽ നിന്നുമാരംഭിച്ച പര്യടനം കെപിസിസി മുൻ പ്രസിഡന്റ് വി.എം. സുധീരൻ ഉദ്ഘാടനം ചെയ്തു. കോണ്ഗ്രസിന്റേയും യുഡിഎഫിന്റേയും പ്രമുഖ നേതാക്കൾ പങ്കെടുത്തു. മുളവന ജംഗ്ഷനിലുള്ള ശ്രീ നാരായണ ഗുരുദേവന്റെയും അയ്യങ്കാളിയുടെയും പ്രതിമകൾക്കു മുന്നിൽ പുഷ്പാർച്ചന നടത്തിയ ശേഷമാണ് തരൂർ പര്യടനം ആരംഭിച്ചത്.
മുളവനയിൽനിന്ന് 8.30ന് ആരംഭിച്ച പര്യടനം ഗൗരീശപട്ടം, കുമാരപുരം, കണ്ണമ്മൂല, കുറവൻകോണം വഴി പറന്പുകോണത്തെത്തിയശേഷം വിശ്രമിച്ചു. തുടർന്ന് മൂന്നുമണിക്ക് വയലിക്കടയിൽ നിന്നാരംഭിച്ച പര്യടനം കുറവൻകോണം ജംഗ്ഷൻ, ദേവസ്വം ബോർഡ് ജംഗ്ഷൻ, നളന്ദ, ചാരാച്ചിറ, നന്ദൻകോട് വഴി നാലാഞ്ചിറ കുരിശടി ജംഗ്ഷനിലെത്തി സമാപിച്ചു.
നെയ്യാറ്റിൻകരയെ ഇളക്കിമറിച്ച് പന്ന്യൻ രവീന്ദ്രൻ
തിരുവനന്തപുരം: നെയ്യാറ്റിൻകരയെ ഇളക്കിമറിച്ച് എൽഡിഎഫ് സ്ഥാനാർഥി പന്ന്യൻ രവീന്ദ്രന്റെ മൂന്നാംഘട്ട പര്യടനം. രാവിലെ വഴിമുക്കിൽ നിന്നാരംഭിച്ച പര്യടനം സിപിഎം സംസ്ഥാന സെക്രട്ടറിയറ്റംഗം ആനാവൂർ നാഗപ്പൻ ഉദ്ഘാടനം ചെയ്തു.
തുടർന്ന് നെയ്യാറ്റിൻകര മുനിസിപ്പാലിറ്റിയിലെ വിവിധ ബൂത്ത് കേന്ദ്രങ്ങളിൽ സ്ഥാനാർഥി പര്യടനം നടത്തി. രാത്രി വൈകി നെയ്യാറ്റിൻകര ബസ് സ്റ്റാൻഡ് ജംഗ്ഷനിലാണ് പര്യടനത്തിനു സമാപനം കുറിച്ചത്.
വിവിധ സ്വീകരണ കേന്ദ്രങ്ങളിലായി ആയിരകണക്കിനാളുകൾ സ്ഥാനാർഥിക്ക് സ്വീകരണമൊരുക്കി. സ്വീകരണങ്ങൾക്ക് സ്ഥാനാർഥി നന്ദി രേഖപ്പെടുത്തി. വിവിധ കേന്ദ്രങ്ങളിൽ ആർ.എസ്. ജയൻ, ശരണ് ശശാങ്കൻ, പി.എസ്. ആന്റസ് തുടങ്ങിയവർ പ്രസംഗിച്ചു.
രാജീവ് ചന്ദ്രശേഖറിനായി കൈവണ്ടിയിൽ പ്രചാരണം
തിരുവനന്തപുരം: അവസാനഘട്ട തെരഞ്ഞെടുപ്പ് പ്രചാരണത്തിന് ആവേശം കൂട്ടാൻ പഴയകാല പ്രചാരണ രീതികളുമായി എൻഡിഎ മുന്നണി അനുകൂലികൾ. എൻഡിഎ സ്ഥാനാർഥി രാജീവ് ചന്ദ്രശേഖറിനു വോട്ടു തേടി, പോയകാലത്തെ അനുസ്മരിപ്പിക്കുന്ന കൈവണ്ടികളുമായാണ് നഗരത്തിലെ വിവിധയിടങ്ങളിൽ ഇവർ പ്രചാരണത്തിനിറങ്ങിയിരിക്കുന്നത്. വൈകുന്നേരം നാലു മുതൽ എട്ടു വരെയാണ് നഗരത്തിലുടനീളം ഈ കൈവണ്ടി യാത്ര.
ശാസ്തമംഗലം, വെള്ളയന്പലം, പാളയം, ഈസ്റ്റ് ഫോർട്ട് റൂട്ടിലായിരുന്നു ആദ്യ ദിവസത്തെ യാത്ര. കമലേശ്വരം, മണക്കാട്, അട്ടക്കുളങ്ങര, കിള്ളിപ്പാലം, കരമന എന്നിവിടങ്ങളിലായിരുന്നു രണ്ടാം ദിവസം. കഴക്കൂട്ടം, തിരുവനന്തപുരം വെസ്റ്റ്, ചാല, ബാലരാമപുരം എന്നിവിടങ്ങളിലായിരുന്നു ഇന്നലെ രാജീവ് ചന്ദ്രശേഖറിന്റെ സ്ഥാനാർഥി പര്യടനം.