Friday, March 29, 2019 11:50 PM IST
മാർച്ച് ലോക അപസ്മാര ബോധവത്കരണ മാസമായി ആചരിക്കുന്നു
അപസ്മാരം എന്ന പേരിൽ സാധാരണയായി കാണുന്ന ഒരു ദീർഘകാലരോഗമാണ് ’ചുഴലി’ അഥവാ ’ജന്നി’. മസ്തിഷ്കത്തിലെ നാഡികൾ ചില പ്രത്യേക സന്ദർഭത്തിൽ ഒത്തുചേർന്ന് ഉണ്ടാക്കുന്ന വൈദ്യുതി തരംഗങ്ങൾ മൂലം ഉണ്ടായേക്കാവുന്നതാണ് ചുഴലിരോഗം. ദ്രുതചലനം, പെരുമാറ്റവൈകല്യങ്ങൾ, വികാരവിക്ഷോഭങ്ങൾ ചിലപ്പോൾ പരിസരബോധം നഷ്ടപ്പെടൽ ഇവയാണു പ്രധാന രോഗലക്ഷണങ്ങൾ. തലച്ചോറിലെ മുഴകൾ, അണുബാധ, ക്ഷതം, മസ്തിഷ്കാഘാതം, ജനിതകരോഗങ്ങൾ എന്നിവയാണ് പ്രധാന രോഗകാരണങ്ങൾ. എന്നാൽ, സങ്കീർണങ്ങളായ പരിശോധനകൾ നടത്തിയാലും 70 ശതമാനത്തോളം രോഗികളിലും യഥാർഥകാരണം കണ്ടെ ത്താൻ കഴിഞ്ഞെന്നുവരില്ല. രോഗം ബാധിച്ചിട്ടുള്ളവരിൽ പല കാരണങ്ങൾ മൂലം രോഗലക്ഷണങ്ങൾ വീണ്ടും പ്രത്യക്ഷപ്പെടാറുണ്ട്. പ്രധാനകാരണങ്ങളിൽ ചിലതു കൃത്യമായി കഴിക്കേണ്ട മരുന്നുകൾ മുടക്കുക, മാനസിക സമ്മർദം, അമിതമായ ഉത്കണ്ഠ, ഹോർമോൺ അസന്തുലിതാവസ്ഥ, ചില ഭക്ഷണപാനീയങ്ങൾ, മദ്യം, വെളിച്ചം, ശബ്ദം, ഉറക്കക്കുറവ് തുടങ്ങിയവയാണ്.
ഇതെങ്ങനെ തരണം ചെയ്യാം?
രോഗമുണ്ടാകുന്ന അവസരത്തിൽ രോഗി കാണിക്കുന്ന ബാഹ്യലക്ഷണങ്ങൾ , അതിലേക്കു നയിക്കുന്ന കാരണങ്ങൾ ഇവ സൂക്ഷമമായി വിശകലനംചെയ്തു കണ്ടുപിടിച്ച് ഒരു ഡയറിയിൽ എഴുതിസൂക്ഷിക്കുന്നതു തുടർചികിത്സയെ ഏറെ സഹായിക്കും. ലോക അപസ്മാര ബോധവത്കരണ മാസത്തിൽ അപസ്മാരം എന്ന രോഗത്തെപ്പറ്റിയും അതിന്‍റെ ലക്ഷണങ്ങൾ, വീണ്ടും രോഗം വരാനുള്ള കാരണങ്ങൾ ഇവയെപ്പറ്റിയും രോഗികളും ബന്ധുക്കളും മനസിലാക്കുകയും അവയെ സൂക്ഷമതയോടെ നിരീക്ഷിച്ചു നേരിടുകയും ചെയ്യുകവഴി ഈ രോഗാവസ്ഥയെ നേരിടാൻ നമുക്കു കഴിയും.
ഡോ. എസ്. അമിത് കുമാർ, സെന്‍റ് മേരീസ് ഹോസ്പിറ്റൽ, തൊടുപുഴ