ഓവുലേഷന്‍ സമയത്ത് അതിശക്തമായ വേദന
Tuesday, July 21, 2020 4:10 PM IST
ഞാന്‍ 24 വയസുള്ള പിജി വിദ്യാര്‍ഥിനിയാണ്. ഓവുലേഷന്‍ സമയത്ത് അതിശക്തമായ വേദനയാണ്. നടക്കാനും കഴിയില്ല. മനംപിരട്ടലും ക്ഷീണവും ഉണ്ടാകാറുണ്ട്. ഇതുമൂലം ഞാന്‍ വളരെയധികം മാനസികപ്രയാസം അനുഭവിക്കുന്നു. ഓവുലേഷന്‍ വേദന കുറയ്ക്കാന്‍ മരുന്നുണ്ടോ?'
അനിത വിശ്വനാഥന്‍, കൊല്ലം

= അണ്ഡവിസര്‍ജനം (ഓവുലേഷന്‍) നടക്കുമ്പോള്‍ പലര്‍ക്കും വിഷമങ്ങളൊന്നും ഉണ്ടാകാറില്ല. അതിനാല്‍ ഓവുലേഷന്‍ നടക്കുന്നുണ്ടോ എന്നറിയാനുള്ള ടെസ്റ്റുകള്‍ പലപ്പോഴും ചെയ്യേണ്ടി വരും. ചിലര്‍ക്ക് ആ സമയത്ത് വയറു വേദനയും ചെറിയ രീതിയിലുള്ള രക്തം പോക്കും, അതു കഴിഞ്ഞാല്‍ അടുത്ത ആര്‍ത്തവം വരെ ദേഹത്തു നീരു വന്നതു പോലെ കനവും തോന്നാം. ആ സമയത്ത് ഒന്നോ രണ്ടോ കിലോ തൂക്കം കൂടുന്നവരും ഉണ്ട്. ആര്‍ത്തവം തുടങ്ങുന്നതോടു കൂടി ഈ വിഷമങ്ങളെല്ലാം മാറും.


ഈ സമയത്ത് ശരീരത്തില്‍ ഉത്പാദിപ്പിക്കപ്പെടുന്ന ഹോര്‍മോണുകളുടെ പ്രവര്‍ത്തന ഫലമാണ് ഇതെല്ലാം. അതുകൊണ്ട് ആ സമയം വേദനസംഹാരി ഗുളികകള്‍ കഴിക്കാം. പാരസെറ്റമോള്‍, ബസ്‌കോപാന്‍ മുതലായ വേദനസംഹാരികളുണ്ട്. ദിവസം ഒന്നോ, രണ്ടോ മൂന്നോ ഗുളികകള്‍ വേദനയുടെ കാഠിന്യം പോലെ കഴിക്കാം. ആഹാരം കഴിച്ചിട്ടു മാത്രം ഈ ഗുളിക കഴിക്കുക.

Copyright @ 2022 , Rashtra Deepika Ltd.