വിഖ്യാത സംവിധായകന് കുമാര് സാഹനി അന്തരിച്ചു
Sunday, February 25, 2024 12:18 PM IST
മുംബൈ: പ്രശസ്ത സംവിധായകനും തിരക്കഥാകൃത്തുമായ കുമാര് സാഹനി അന്തരിച്ചു. 83 വയസായിരുന്നു. മായാദർപ്പൺ, ഖയാൽ ഗാഥാ, തരംഗ്, കസ്ബ തുടങ്ങിയവ ശ്രദ്ധേയ ചിത്രങ്ങളാണ്. സംവിധായകനു പുറമേ അധ്യാപകൻ, എഴുത്തുകാരൻ എന്നീ നിലകളിലും ശ്രദ്ധേയനാണ്.
1940 ഡിസംബര് ഏഴിന് സിന്ധ് മേഖലയിലെ ലര്ക്കാനയിലാണ് ജനനം. ഇന്ത്യാ വിഭജനത്തിന് ശേഷം കുടുംബസമേതം മുംബൈയിലേയ്ക്ക് താമസം മാറ്റുകയായിരുന്നു.
പൂനെ ഫിലിം ഇൻസ്റ്റിറ്റ്യൂട്ടിൽ നിന്നും പഠിച്ചിറങ്ങിയ സാഹനി പ്രശസ്ത സംവിധായകൻ ഋത്വിക് ഘട്ടക്കിന്റെ പ്രിയപ്പെട്ട ശിഷ്യന്മാരിൽ ഒരാളായിരുന്നു. 1972ൽ ഒരുക്കിയ മായാദർപ്പൺ മികച്ച ഹിന്ദി ചിത്രത്തിനുള്ള ദേശീയ പുരസ്കാരം നേടി.
1989ൽ ഖായൽ ഗാഥയും 1991ൽ ഭവനതരണയും സാഹനി ഒരുക്കി. 1997ൽ രബീന്ദ്രനാഥ് ടാഗോറിന്റെ ഛാർ അധ്യായ് എന്ന നോവലിനെ കുമാർ സാഹനി ചലച്ചിത്രമാക്കി. ഒഡീസി നർത്തകി നന്ദിനി ഘോഷാലായിരുന്നു പ്രധാന കഥാപാത്രത്തെ അവതരിപ്പിച്ചത്.