500 അംഗങ്ങളുള്ള വൈറ്റ്ഹൗസ് കറസ്പോണ്ടന്റ്സ് അസോസിയേഷനാണ് ഇതിന്റെ നിയന്ത്രണം. കരീന് ഷോംപിയാണ് ബൈഡന്റെ പ്രസ് സെക്രട്ടറി. അവരാണ് പതിവായി പത്രസമ്മേളനം നടത്തുന്നത്.
പ്രസ് സെക്രട്ടറിയാകുന്ന ആദ്യത്തെ കറുത്ത വംശജ, ആദ്യത്തെ ട്രാന്സ്ജെണ്ടര് തുടങ്ങിയ പ്രത്യേകതകള് കരീനുണ്ട്. ഹെയ്തിയില്നിന്നുള്ള ഈ കുടിയേറ്റക്കാരി കമല ഹാരിസിനൊപ്പം പ്രവര്ത്തിച്ചിട്ടുണ്ട്. പ്രമുഖ ചാനലുകളിലും കൊളംബിയ സര്വകലാശാലയിലും പ്രവൃത്തിപരിചയമുണ്ട്.
വൈറ്റ്ഹൗസ് പോലെ ലളിതവും സുന്ദരവുമാണ് പ്രസ് റൂം. വൈറ്റ് ഹൗസ് എന്ന് ആലേഖനം ചെയ്തിട്ടുള്ള പോഡിയത്തിനു പിറകില് ഓവല് മാതൃകയില് വൈറ്റ്ഹൗസ് എംബ്ലം. 50 നക്ഷത്രങ്ങളും ഇടവിട്ട് ചുവപ്പും വെള്ളയും വരകളുമുള്ള അമേരിക്കന് പതാക തൊട്ടടുത്ത്. ഏറ്റവും പിറകില് ചാനല് കാമറകള്. പ്രസിഡന്റ് റൂസ്വെല്റ്റിന് ഫിസിയോ തെറാപ്പി ചെയ്യാന് 1933ല് നിര്മിച്ച നീന്തല്ക്കുളത്തിനു മുകളിലാണ് 1970ല് പ്രസിഡന്റ് നിക്സണ് പ്രസ് റൂം നിര്മിച്ചത്.
പത്രക്കാരെ കുളത്തിലെറിഞ്ഞേക്കൂ എന്ന് ഒരിക്കല് നിക്സണ് പറഞ്ഞത് അച്ചെട്ടായി. സ്വിമ്മിംഗ് പൂളിലേക്കു സ്വാഗതം എന്നു പറഞ്ഞാണ് ബൈഡന് പത്രസമ്മേളനം തുടങ്ങിയത്.
1961ല് പ്രസിഡന്റ് ജോണ് എഫ്. കെന്നഡിയാണ് ഇവിടെനിന്ന് പത്രസമ്മേളനം ആദ്യമായി സജീവ സംപ്രേഷണം നടത്തി പുതിയൊരു യുഗപ്പിറവിക്കു തുടക്കമിട്ടത്. തുടര്ന്ന് ലോകം അമേരിക്കന് പ്രസിഡന്റുമാര്ക്ക് കാതോര്ക്കുന്നത് ഈ ചെറിയ മുറിയില്നിന്നാണ്.