ഉത്തരാഖണ്ഡിൽ ഹാട്രിക് ലക്ഷ്യമിട്ട് ബിജെപി : Deepika.com National News |

Click here for detailed news of all items

ഉത്തരാഖണ്ഡിൽ ഹാട്രിക് ലക്ഷ്യമിട്ട് ബിജെപി

Friday, April 19, 2024 1:11 AM IST

ഡെറാഡൂൺ: ഉത്തരാഖണ്ഡിലെ അഞ്ചു ലോക്സഭാ മണ്ഡലങ്ങളും ഇന്നു വിധിയെഴുത്ത് നടത്തും. സംസ്ഥാനത്ത് സന്പൂർണ വിജയത്തിന്‍റെ ഹാട്രിക് ആണ് ബിജെപി ലക്ഷ്യമിടുന്നത്.

2014, 2019 ലോക്സഭാ തെരഞ്ഞെടുപ്പുകളിൽ മുഴുവൻ സീറ്റുകളിലും ബിജെപി വിജയം നേടിയിരുന്നു. ഹരിദ്വാർ, പൗരി ഗഡ്‌വാൾ, തെഹ്‌രി ഗഡ്‌വാൾ, നൈനിറ്റാൾ-ഉധം സിംഗ് നഗർ, അൽമോറ എന്നിവയാണ് ഉത്തരാഖണ്ഡിലെ ലോക്സഭാ മണ്ഡലങ്ങൾ. അൽമോറ പട്ടികജാതി സംവരണ മണ്ഡലമാണ്.

ആകെ വോട്ടർമാർ 83 ലക്ഷം. 55 സ്ഥാനാർഥികളാണ് രംഗത്തുള്ളത്. സിറ്റിംഗ് എംപിമാരായ അജയ് ഭട്ട്(നൈനിറ്റാൾ-ഉധം സിംഗ് നഗർ), മാലാ രാജ്യലക്ഷ്മി ഷാ(തെഹ്‌രി ഗഡ്‌വാൾ)അജയ് താംത(അൽമോറ) എന്നിവർ വീണ്ടും മത്സരിക്കുന്നു. ഹരിദ്വാറിൽ രമേഷ് പൊഖ്റിയാൽ നിഷാങ്കിനു പകരം മുൻ മുഖ്യമന്ത്രി ത്രിവേന്ദ്ര സിംഗ് റാവത്തും പൗരി ഗഡ്‌വാളിൽ തിരത് സിംഗ് റാവത്തിനു പകരം അനിൽ ബലൂനിയും മത്സരിക്കുന്നു.

മുൻ പിസിസി അധ്യക്ഷൻ ഗണേഷ് ഗോഡിയാൽ(പൗരി ഗഡ്‌വാൾ), മുൻ മുഖ്യമന്ത്രി ഹരീഷ് റാവത്തിന്‍റെ മകൻ വീരേന്ദ്ര റാവത്ത്(ഹരിദ്വാർ), ജോത് സിംഗ് ഗുൻസോല(തെഹ്‌രി ഗഡ്‌വാൾ), പ്രകാശ് ജോഷി(നൈനിറ്റാൾ-ഉധം സിംഗ് നഗർ), പ്രദീപ് താംത(അൽമോറ) എന്നിവരാണു കോൺഗ്രസ് സ്ഥാനാർഥികൾ.

ബിഎസ്പിയുടെയും ഉത്തരാഖണ്ഡ് ക്രാന്തി ദളിന്‍റെയും സ്ഥാനാർഥികളുണ്ടെങ്കിലും എല്ലാ മണ്ഡലങ്ങളിലും ബിജെപിയും കോൺഗ്രസും തമ്മിലാണു പ്രധാന മത്സരം. അഞ്ചിടത്തും ബിജെപി വിജയം പ്രതീക്ഷിക്കുന്നു. പൗരി ഗഡ്‌വാൾ, ഹരിദ്വാർ മണ്ഡലങ്ങളിൽ ഇഞ്ചോടിഞ്ചു മത്സരമാണ്. ഹരിദ്വാറിലെ ദളിത്, ന്യൂനപക്ഷ വോട്ടുകൾ തുണയാകുമെന്നാണു കോൺഗ്രസിന്‍റെ പ്രതീക്ഷ.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.