കുമാരി സെൽജയും ദീപേന്ദർ ഹൂഡയും കോൺഗ്രസ് സ്ഥാനാർഥികൾ : Deepika.com National News |

ചണ്ഡിഗഡ്: ഹരിയാനയിലെ എട്ടു സീറ്റുകളിലെ കോൺഗ്രസ് സ്ഥാനാർഥികളെ പ്രഖ്യാപിച്ചു. മുൻ കേന്ദ്രമന്ത്രി കുമാരി സെൽജ സിർസയിലും രാജ്യസഭാംഗം ദീപേന്ദർ ഹൂഡ റോഹ്തക്കിലും മത്സരിക്കും.

സിർസയിൽ അശോക് തൻവർ ആണു ബിജെപി സ്ഥാനാർഥി. സെൽജയും തൻവറും മുൻ പിസിസി പ്രസിഡന്‍റുമാരാണ്. യുപിയുടെ ചുമതലയുള്ള എഐസിസി ജനറൽ സെക്രട്ടറിയായി സെൽജ മുന്പ് സിർസയിൽനിന്നു വിജയിച്ചിട്ടുണ്ട്.

ഹരിയാന യൂത്ത് കോൺഗ്രസ് അധ്യക്ഷൻ ദിവാൻഷു ബുധിരാജ (കർണാൽ), ജയ് പ്രകാശ് (ഹിസാർ), സത്പാൽ ബ്രഹ്മചാരി(സോനിപത്), മഹേന്ദ്ര പ്രതാപ് (ഫരീദാബാദ്), വരുൺ ചൗധരി (അംബാല), റാവു ദാൻ സിംഗ് (ഭിവാനി-മഹേന്ദ്രഗഡ്) എന്നിവരാണു മറ്റു സ്ഥാനാർഥികൾ.

ബിജെപി വിട്ടെത്തിയ ബ്രിജേന്ദ്ര സിംഗിന് ഹിസാർ സീറ്റ് നല്കുമെന്ന് മുന്പ് റിപ്പോർട്ടുണ്ടായിരുന്നു. ഭിവാനി-മഹേന്ദ്രഗഡ് മണ്ഡലത്തിൽ മുതിർന്ന കോൺഗ്രസ് നേതാവ് കിരൺ ചൗധരിയുടെ മകൾ ശ്രുതി ചൗധരിക്ക് സീറ്റ് നിഷേധിച്ചു.

ഭൂപേന്ദർ സിംഗ് ഹൂഡയുടെ അനുയായികൾക്കാണ് കൂടുതൽ സീറ്റുകളും ലഭിച്ചത്. ഹരിയാനയിലെ പത്തു മണ്ഡലങ്ങളിൽ ഒന്പതിലാണ് കോൺഗ്രസ് മത്സരിക്കുന്നത്. കുരുക്ഷേത്ര സീറ്റ് എഎപിക്ക് നല്കി. ഗുരുഗ്രാം മണ്ഡലത്തിലെ സ്ഥാനാർഥിയെ കോൺഗ്രസ് പ്രഖ്യാപിച്ചി‌ട്ടില്ല.