ഓണ്‍ലൈൻ പഠനം: വിദ്യാർഥികൾക്കു പ്രത്യേക പാക്കേജിനു സർക്കാർ ഇടപെടണം : Deepika.com Nattu Visesham

KOTTAYAM

ഓണ്‍ലൈൻ പഠനം: വിദ്യാർഥികൾക്കു പ്രത്യേക പാക്കേജിനു സർക്കാർ ഇടപെടണം

Saturday, August 1, 2020 11:57 PM IST

കോട്ടയം: വിദ്യാർഥികളുടെ പഠനത്തിന് ഉദാരമായ നിരക്കിൽ ഇന്‍റർനെറ്റ് കണക്ഷനുകൾ ലഭ്യമാക്കാൻ സർക്കാർ ഇടപെടലുണ്ടാകണമെന്നു പരക്കെ ആവശ്യമുയർന്നു. സ്കൂളുകൾ പൂർണമായി അടച്ചിടുകയും പഠനവും പരീക്ഷയും ഓണ്‍ലൈനിൽ തുടരുകയും ചെയ്യുന്ന സാഹചര്യത്തിൽ സാന്പത്തിക പിന്നാക്കാവസ്ഥയിലുള്ള കുട്ടികളുടെ പഠനം മുടങ്ങുമെന്ന ആശങ്ക ഉയരുകയാണ്. ആദിവാസി, പിന്നാക്ക മേഖലകളിൽ ഒട്ടേറെ കുട്ടികൾ ഇപ്പോഴും ഓണ്‍ലൈൻ ക്ലാസുകളിൽ പഠനം സജീവമാക്കിയിട്ടില്ല.

കുട്ടികൾക്ക് പഠനത്തിനായി ഉദാരനിരക്കിൽ ഇൻർനെറ്റ് പാക്കേജ് ഏർപ്പെടുത്താൻ വിവിധ മൊബൈൽ ഡേറ്റാ കന്പനികൾക്ക് സർക്കാർ നിർദേശം നൽകുന്നില്ലെങ്കിൽ വലിയൊരു വിഭാഗം കുട്ടികളുടെയും പഠനം മുടങ്ങും.

കോവിഡ് സാന്പത്തിക മാന്ദ്യത്തിനു നടുവിലും ലാപ് ടോപ്പുകൾക്ക് അയ്യായിരത്തിലേറെ രൂപയുടെ വർധനയാണ് വിവിധ കന്പനികൾ വരുത്തിയത്. ടാബ്‌ലറ്റ്, സ്മാർട്ട് ഫോണ്‍ എന്നിവയുടെ വിലയിലും വലിയ വർധനവുണ്ടായി. ഓണ്‍ലൈൻ മാർക്കറ്റിംഗ് കോവിഡ് പശ്ചാത്തലത്തിൽ നിലച്ചതിനാൽ വിലക്കുറവിൽ ഇത്തരം ഇലക്‌ട്രോ‌ണിക് സാധനങ്ങൾ വാങ്ങിയെടുക്കാനും കഴിയുന്നില്ല. നിലവിൽ ബാങ്ക് ലോണെടുത്താണ് പാവപ്പെട്ട കുട്ടികൾ ഇത്തരം പഠനസാമഗ്രികൾ വാങ്ങിയിരിക്കുന്നത്. കെഎസ്എഫ്ഇ വഴി ലാപ്ടോപ് വാങ്ങുന്നവരും ഏറെയാണ്.

ചൈനയിൽനിന്നും ഇറക്കുമതി കുറഞ്ഞു എന്ന ന്യായത്തിൽ ഇലക്‌ട്രോണിക് സാമഗ്രികൾക്കു വില കുത്തനെ ഉയർത്തിയതിന്‍റെ ആഘാതം സാന്പത്തിക പിന്നാക്കാവസ്ഥയിലുള്ള വിദ്യാർഥികൾക്കാണ്. ഒന്നിലേറെ കുട്ടികൾക്കു വീടുകളിൽ ഒരേസമയം ക്ലാസുകൾ വരുന്പോൾ ചെറിയ ക്ലാസുകളിലെ കുട്ടികൾ ഓണ്‍ലൈൻ ക്ലാസുകളിൽനിന്ന് വിട്ടുനിൽക്കേണ്ട സാഹചര്യമാണ്.
അതേസമയം, ഒന്നിലേറെപ്പേർ ഒരേ വീട്ടിൽ പ്രൊഫഷണൽ കോഴ്സുകളിലും ഉയർന്ന ക്ലാസുകളിലും പഠിക്കുന്ന സാഹചര്യമുണ്ടാകുന്പോൾ ഭാരിച്ച അധികച്ചെലവാണ് പല വീടുകളിലുമുള്ളത്.

സാന്പത്തിക പിന്നോക്കാവസ്ഥ നേരിടുന്ന കുട്ടികൾക്കു പഠനം ഭാരിച്ച ബാധ്യതയായി മാറുകയാണ്. രക്ഷിതാക്കളുടെ നിലവിലെ വരുമാനത്തിൽ മൊബൈൽ ചാർജ് താങ്ങാൻ പറ്റാത്ത സാഹചര്യം. മാസ പാക്കേജിൽ ഇന്‍റർനെറ്റ് കണക്‌ഷനെടുക്കുന്പോൾ മോഡം ഉൾപ്പെടെയുള്ള സാമഗ്രികൾക്കു നാലായിരത്തിലേറെ രൂപ ചെലവുണ്ട്. വിക്‌ടേഴ്സ് ചാനൽ വഴിയുള്ള ക്ലാസുകളിൽ പങ്കെടുക്കുന്നതിനു കേബിൾ കണക്‌ഷനെടുക്കുന്നതിലും മാസംതോറും പണം നൽകണം.