കോട്ടയം വോട്ടുപെട്ടിയിലടച്ച രഹസ്യങ്ങൾ : Deepika.com Nattu Visesham

കോട്ടയം: ജില്ലയിലെ ഏറെ മണ്ഡലങ്ങളിലും മത്സരം ഫോട്ടോ ഫിനിഷിംഗിലായിരുന്നു. മുന്നണികളും സ്ഥാനാർഥികളും ചേരികൾ മാറി മത്സരിച്ച തെരഞ്ഞെടുപ്പിൽ മൂന്നു മുന്നണികളിലും വോട്ടുകളിൽ വ്യതിയാനം എങ്ങനെ പ്രതിഫലിക്കും എന്നറിയാൻ മേയ് രണ്ടു വരെ കാത്തിരിക്കണം.
2016ലെ തെരഞ്ഞെടുപ്പിനെയും 2019ലെ ലോക് സഭാ തെരഞ്ഞെടുപ്പിനെയും ഡിസംബറിലെ തദ്ദേശ പോരാട്ടത്തെയുംകാൾ ഏറെ വ്യത്യസ്തമായിരുന്നു ചൊവ്വാഴ്ചത്തെ വിധിയെഴുത്ത്. വോട്ടിംഗ് ശതമാനത്തിലെ വ്യതിയാനം ഇതിന്‍റെ സൂചകമാണ്. സ്ഥാനാർഥി നിർണയത്തിൽ അനിശ്ചിതത്വവും അനൈക്യവുമുണ്ടായ യുഡിഎഫ് അവസാനറൗണ്ടിൽ സജീവമായി. പ്രത്യേകിച്ചും രാഹുൽ ഗാന്ധി ഉണർത്തിയ റോഡ് ഷോ വലിയ ഓളമുണ്ടാക്കി.
കോട്ടയം, പുതുപ്പള്ളി, വൈക്കം, പാലാ ഒഴികെ മണ്ഡലങ്ങളിൽ യുഡിഎഫ് സ്ഥാനാർഥി നിർണയം വൈകിയപ്പോൾ എൽഡിഎഫ് പ്രചാരണം തുടങ്ങിക്കഴിഞ്ഞിരുന്നു.
പാലാ, പൂഞ്ഞാർ, കാഞ്ഞിരപ്പള്ളി, ചങ്ങനാശേരി മണ്ഡലങ്ങളിൽ ഇക്കുറി ഇഞ്ചോടിഞ്ച് പോരാട്ടമായിരുന്നു. ഇതിൽതന്നെ ചതുഷ്കോണ മത്സരത്തിൽ ശ്രദ്ധ നേടുന്ന പൂഞ്ഞാറിലെ ധ്രൂവീകരണം ആർക്ക് അനുകൂലം എന്ന് ഫലം വരുന്പോൾ മാത്രമേ വ്യക്തമാകൂ.

പുതുപ്പള്ളി
കേരള കോണ്‍ഗ്രസ് -എം ചേരി മാറ്റം പുതുപ്പള്ളിയിൽ ഉമ്മൻ ചാണ്ടിയുടെ മുൻതൂക്കത്തിൽ എത്ര കുറവു വരുത്തിയേക്കാം എന്നതും കാണേണ്ടതുണ്ട്. 2016ൽ ജെയ്ക് സി. തോമസിനെതിരേ ഉമ്മൻ ചാണ്ടിക്ക് 27,092 വോട്ടുകളായിരുന്നു ഭൂരിപക്ഷം. അകലക്കുന്നം, അയർക്കുന്നം പഞ്ചായത്തുകളിലെ കേരള കോൺഗ്രസ് -എം സ്വാധീനവും കൂരോപ്പട പഞ്ചായത്തിലെ ബിജെപി മുൻതൂക്കവും മണർകാട് ഉൾപ്പെടെ ചില പ്രദേശങ്ങളിലെ പ്രചാരണ മാന്ദ്യവും ഉമ്മൻ ചാണ്ടിയുടെ താരമൂല്യം ഇക്കുറി കുറച്ചേക്കാമെന്നു കരുതുന്നവരുണ്ട്.

പാലാ
പാലായിൽ പൊരിഞ്ഞ പോരിനു പിന്നാലെ അടിയൊഴുക്ക് എന്നൊരു സംസാരം കൂടി ഉയരുന്പോൾ ഒഴുക്ക് എവിടെ നിന്ന് എങ്ങോട്ട് ആരിലേക്ക് എന്നതാണ് അറിയാനുള്ളത്. ബിജെപി 2016ൽ 24,821 വോട്ടുകളും 2019 ഉപതെരഞ്ഞെടുപ്പിൽ 18,044 വോട്ടുകളും പാലായിൽ നേടിയിരുന്നു.
രണ്ടു തെരഞ്ഞെടുപ്പുകളിലും എൻ. ഹരിയായിരുന്നു സ്ഥാനാർഥി. ഇത്തവണ ജെ. പ്രമീളാ ദേവി എത്ര വോട്ടുകൾ നേടുമെന്നതും നിർണായകം. മുത്തോലി പഞ്ചായത്ത് നിലവിൽ ബിജെപി ഭരിക്കുന്നു എന്നതും ശ്രദ്ധേയം.
ജോസ് കെ. മാണിയും മാണി സി. കാപ്പനും ഒരുപോലെ കരുത്തരും കരുതലുള്ളവരുമാണ്. മുന്നണി മാറ്റം സംഭവിച്ചിരിക്കെയും ഇരുവർക്കും വ്യക്തിബന്ധങ്ങളുണ്ട്.
കടുത്ത മത്സരം നടന്ന 2019ലെ ഉപതെരഞ്ഞെടുപ്പിൽ യുഡിഎഫ് ബന്ധം ആടിയുലഞ്ഞപ്പോൾ, പാർട്ടിയും പാർട്ടി ചിഹ്നവുമില്ലാതെ മത്സരിച്ച ജോസ് ടോമിന് 2,943 വോട്ടുകളുടെ കുറവേ ഉണ്ടായിരുന്നുള്ളൂ എന്നത് ശ്രദ്ധേയം.
എംഎൽഎ എന്ന നിലയിൽ മാണി സി. കാപ്പന്‍റെ ശൈലിക്ക് പിന്തുണക്കാർ കൂടിയില്ലേ എന്നതു മറുചോദ്യം. ഇടതും കേരള കോണ്‍ഗ്രസ് -എമ്മും ചേർന്നാൽ പാലായിൽ ജോസ് കെ. മാണി ശക്തിയല്ലേ എന്നതും മറ്റൊരു ചോദ്യം.

പൂഞ്ഞാർ
പൂഞ്ഞാറിൽ പി.സി. ജോർജ് അക്കൗണ്ട് നിലനിറുത്തിയാൽ അതു സംഭവമാകും. 2016ലെ 28,000 ഭൂരിപക്ഷത്തിന്‍റെ രാഷ്‌ട്രീയക്കളിയും കരുനീക്കവുമല്ല ഇത്തവണ അരങ്ങേറിയത്. സെബാസ്റ്റ്യൻ കുളത്തുങ്കലിനും ടോമി കല്ലാനിക്കും ഒന്നുപോലെ വിജയം അവകാശപ്പെടാൻ സാധ്യതകളും സാഹചര്യങ്ങളും പലതാണ്. എൻഡിഎ വോട്ടുകളിലുണ്ടാകാവുന്ന ധ്രൂവീകരണം എത്രയെന്നതും മുപ്പത്തയ്യായിരത്തിനു മുകളിലുള്ള മുസ്‌ലിം വോട്ടുകൾ ആർക്ക് കൂടുതലായി ലഭിച്ചു എന്നതും പൂഞ്ഞാറിൽ നിർണായകം.
ഇടതിന്‍റെ പിന്തുണയിൽ സെബാസ്റ്റ്യൻ കുളത്തുങ്കലും രാഹുൽ ഗാന്ധിയുടെ വരവോടെ ടോമി കല്ലാനിയും വീറുറ്റ പ്രചാരണം നടത്തി. ഇതേസമയം പി.സി. ജോർജ് ഇഫക്ട് മുന്നണികളിൽ വിള്ളൽ വീഴ്ത്തി എത്രവരെ ഉയരാം താഴാം എന്നതാണ് അറിയാനുള്ളത്.

ചങ്ങനാശേരി
ചങ്ങനാശേരിയിൽ 2016ൽ സി.എഫ്. തോമസും ഡോ. കെ.സി. ജോസഫും തമ്മിലെ ഇഞ്ചോടിഞ്ച് മത്സരത്തിൽ സിഎഫിന് 1,849 വോട്ടുകളായിരുന്നു ഭൂരിപക്ഷം. ഒന്നര പതിറ്റാണ്ടായി ചങ്ങനാശേരിയിലെ യുഡിഎഫ് വിജയം തുലോം നേർത്തതായിരുന്നു.
ഇത്തവണയും അങ്ങനെ വരുമെന്നാണ് സൂചന. വി.ജെ. ലാലിയും ജോബ് മൈക്കിളും തമ്മിലെ മത്സരത്തിൽ പേഴ്സണൽവോട്ടുകൾ നിർണായകമാകും. ചങ്ങനാശേരിയിൽ കേരള കോണ്‍ഗ്രസുകൾ തമ്മിലെ ബലപരീക്ഷണം എന്നതും പ്രസക്തം.

കാഞ്ഞിരപ്പള്ളി
കാഞ്ഞിരപ്പള്ളിയിൽ എൻ. ജയരാജും ജോസഫ് വാഴയ്ക്കനും അൽഫോൻസ് കണ്ണന്താനവും തമ്മിലെ മത്സരത്തിൽ പാർട്ടിയും മുന്നണിയും പോലെ സാമുദായിക വോട്ടു ധ്രൂവീകരണവും വിജയഘടകമായേക്കാം. ബിജെപി മുൻഗണനാ ലിസ്റ്റിൽപ്പെടുത്തി കണ്ണന്താനത്തെ നേരിട്ടിറക്കിയ കാഞ്ഞിരപ്പള്ളിയിൽ ബിജെപിക്ക് മുപ്പതിനായിരത്തിനു മുകളിൽ എത്ര വോട്ടുകൾ എന്നത് യുഡിഎഫ്, എൽഡിഎഫ് വിജയത്തെ സ്വാധീനിക്കാം.

ഏറ്റുമാനൂർ
ഏറ്റുമാനൂരിൽ യുഡിഎഫിനും എൽഡിഎഫിനും വിവിധ പഞ്ചായത്തുകളിൽ വ്യക്തമായ ആധിപത്യമുണ്ട്. രണ്ടു പതിറ്റാണ്ട് യുഡിഎഫിനൊപ്പമായിരുന്ന മണ്ഡലം പിന്നീട് എൽഡിഎഫിലെത്തുകയായിരുന്നു. പടിഞ്ഞാറൻ മേഖലയിൽ എൽഡിഎഫിനു നേരിയ മേൽക്കൈയുണ്ട്. എന്നാൽ അതിരന്പുഴ, ആർപ്പൂക്കര, ഏറ്റുമാനൂർ മേഖല യുഡിഎഫ് കേന്ദ്രങ്ങളാണ്.
ബിഡിജെഎസിനെ ഒഴിവാക്കി ബിജെപി മണ്ഡലം ഏറ്റെടുത്തതും ലതിക സുഭാഷ് സ്വതന്ത്രയായി വന്നതും മത്സരം കടുപ്പിച്ചു.

വൈക്കം
പരന്പരാഗത ഇടതുകോട്ടയായ വൈക്കം ഇത്തവണയും ഇളകാനിടയില്ല. സിറ്റിംഗ് എംഎൽഎ സി.കെ. ആശയ്ക്കെതിരേ പി.ആർ. സോനയ്ക്ക് മികച്ച മത്സരം കാഴ്ചവയ്ക്കാനാകുമെങ്കിലും എൽഡിഎഫ് മുന്നിലാണ്. എന്നാൽ ജില്ലയിലെ ഉയർന്ന വിജയ ശതമാനം വൈക്കത്തുണ്ടായത് യുഡിഎഫിന് പ്രതീക്ഷ നൽകുന്നു.

കോട്ടയം
കോട്ടയം മണ്ഡലത്തിൽ ബിഡിജെഎസ് എത്രവോട്ട് നേടും എന്നത് വ്യക്തമല്ല. 2016ൽ 12,582 വോട്ടുകൾ മാത്രമേ എൻഡിഎ ഇവിടെ പെട്ടിയിലാക്കിയുള്ളൂ. ഇതര തെരഞ്ഞെടുപ്പുകളിൽ കാൽ ലക്ഷത്തോളം വോട്ടുകൾ എൻഡിഎ നേടാറുള്ള മണ്ഡലത്തിലാണ് കൗതുകകരമായ ഈ വ്യതിയാനം. 2016ൽ തിരുവഞ്ചൂർ രാധാകൃഷ്ണൻ 33,632 വോട്ടുകളുടെ ഭൂരിപക്ഷത്തിൽ ജില്ലയിൽ ഒന്നാമതെത്തിയിരുന്നു.

കടുത്തുരുത്തി
കടുത്തുരുത്തിയിൽ ഇരുമുന്നണികളും കടുത്ത മത്സരം കാഴ്ചവച്ചു. മോൻസ് ജോസഫിനും സ്റ്റീഫൻ ജോർജിനും അവകാശപ്പെടാൻ ഘടകങ്ങൾ പലതുണ്ട്. ഇരുവരും തമ്മിൽ മുൻപും നിരവധി പോരാട്ടങ്ങൾക്ക് മണ്ഡലം വേദിയായി.
കേരള കോണ്‍ഗ്രസുകൾ തമ്മിലെ മത്സരം എന്നതിനേക്കാൾ മോൻസും സ്റ്റീഫനും തമ്മിലെ മത്സരം എന്നതാണ് ചിത്രം.