ലാറ്റക്സ് വിൽപനയിൽ പകൽക്കൊള്ള; ഡിആർസി പരിശോധന അശാസ്ത്രീയം : Deepika.com Nattu Visesham

KOTTAYAM

ലാറ്റക്സ് വിൽപനയിൽ പകൽക്കൊള്ള; ഡിആർസി പരിശോധന അശാസ്ത്രീയം

Friday, March 5, 2021 11:47 PM IST

കോട്ടയം: ലാറ്റക്സ് വിൽപനയിൽ ഇടനിലക്കാരും ഡീലർമാരും ഒത്തുകളിച്ചു കർഷകരെ വ്യാപകമായി ചൂഷണം ചെയ്യുന്നതായി പരാതി.
ഡിആർസി നിരക്ക്, ലാറ്റക്സിന്‍റെ തൂക്കം, സർവീസ് ചാർജ് എന്നിവയുടെ പേരിൽ വലിയ ചൂഷണത്തിന് ലാറ്റക്സ് സംഭരിച്ചുവിൽക്കുന്നവർ ഇരയാകുന്നു. ലാറ്റക്സ് വില ഉയർന്നതോടെ തോട്ടങ്ങളിൽനിന്നു വലിയ തോതിൽ റബർ പാൽ വിൽക്കുന്ന ഈ സീസണിൽ കർഷകർ നേരിടുന്ന ചൂഷണത്തിൽ റബർ ബോർഡ് പൊതുനിർദേശം നൽകുകയോ ഇടപെടുകയോ ചെയ്യുന്നില്ല.
വീപ്പ വാടക, ലാറ്റക്സ് ഉറഞ്ഞുപോകാതിരിക്കാൻ ചേർക്കുന്ന അമോണിയ തുടങ്ങിയവയുടെ പേരിൽ മാർക്കറ്റ് വിലയിൽ 10 രൂപയുടെ വരെ കിഴിവ് ഇടനിലക്കാർ കൈവശപ്പെടുത്തുന്നു. വീപ്പയിൽ സംഭരിച്ച ലാറ്റക്സ് നന്നായി ഇളക്കാതെയും വീപ്പയുടെ അടിവശം വരെ ട്യൂബ് താഴ്ത്താതെയും അശാസ്ത്രീയമായി സാന്പിൾ ശേഖരിച്ച് ഡിആർസി കണക്കാക്കുകയാണു പതിവ്.
സാന്പിളിന്‍റെ ഒരു ഭാഗം കർഷകർക്ക് നൽകാറുണ്ടെങ്കിലും ഡിആർസി പരിശോധനാ സംവിധാനം അപ്രാപ്യമായതിനാൽ പലരും ഇതിനു ശ്രമിക്കാറില്ല. കച്ചവടക്കാർ പറയുന്ന നിരക്ക് മാനദണ്ഡമാക്കേണ്ടിവരുന്നതിനാൽ കർഷകർക്ക് വലിയ നഷ്ടമാണ് ഡിആർസിയിലുണ്ടാകുന്നത്. പാൽ വീപ്പ തോട്ടങ്ങളിൽ വച്ച് തൂക്കം എടുത്ത് ബോധിപ്പിക്കാതെ ഫാക്ടറികളിലും ഗോഡൗണുകളിലും എത്തിച്ച് തൂക്കം പറയുന്നതിലും കബളിപ്പിക്കൽ വ്യാപകമാണെന്ന് കർഷകർ പറയുന്നു.