വൈക്കത്തെ കാമറകൾ മിഴിയടച്ചിട്ട് നാളുകൾ : Deepika.com Nattu Visesham

KOTTAYAM

വൈക്കത്തെ കാമറകൾ മിഴിയടച്ചിട്ട് നാളുകൾ

Monday, March 1, 2021 11:04 PM IST

വൈക്കം: വൈക്കം നഗരത്തിലെ പ്രധാന നിരത്തുകളിലെ ജംഗ്ഷനിലടക്കം സ്ഥാപിച്ച കാമറകൾ പലതും തകരാറിലായിട്ടും നന്നാക്കാൻ അധികൃതർ നടപടി സ്വീകരിക്കുന്നില്ല.
നഗരത്തിലെ കാമറകളെ വൈക്കം പോലീസ് സ്റ്റേഷനിലെ കണ്‍ട്രോൾ റൂമുമായി ബന്ധിപ്പിച്ചിരിക്കുന്നതിനാൽ ഗതാഗത സുരക്ഷ ഉറപ്പാക്കുന്നതിനും സാമൂഹ്യ വിരുദ്ധ പ്രവർത്തനങ്ങൾ നിയന്ത്രിക്കുന്നതിനും പോലീസിന് ഏറെ ഉപകരിച്ചിരുന്നു. എംഎൽഎ ഫണ്ടിൽനിന്നു ലക്ഷങ്ങൾ ചെലവഴിച്ചു മുപ്പതിലധികം കാമറകളാണ് നഗരത്തിൽ സ്ഥാപിച്ചിരുന്നത്. നഗരത്തിലെ പല വാഹന അപകടങ്ങളടക്കമുള്ള സംഭവങ്ങളിലെ യാഥാർഥ്യം മനസിലാക്കാൻ കാമറ ദൃശ്യങ്ങൾ പോലീസിനെ ഏറെ സഹായിച്ചിരുന്നു. വാഹന അപകടങ്ങൾ തുടർക്കഥയായ വൈക്കം - വെച്ചൂർ റോഡിലെ ചേരുംചുവട് ജംഗ്ഷനിൽ സ്ഥാപിച്ചിരിക്കുന്ന കാമറ തകരാറിലായി രണ്ടു മാസങ്ങൾ കഴിഞ്ഞു. ഒരു വർഷം മുന്പ് സ്വകാര്യബസും കാറും കൂട്ടിമുട്ടിയുണ്ടായ അപകടത്തിൽ കാറിൽ സഞ്ചരിച്ചിരുന്ന നാലുപേർ മരിച്ചത് ചേരുംചുവട് ജംഗ്ഷനിലായിരുന്നു. ഇതിനു പുറമേയും പല അപകടങ്ങളിലായി ഇവിടെ നിരവധി പേരുടെ ജീവൻ പൊലിഞ്ഞിട്ടുണ്ട്. കാമറകൾ നന്നാക്കുന്നതിന് അധികൃതർ നടപടി സ്വീകരിക്കണമെന്ന് നാട്ടുകാർ ആവശ്യപ്പെട്ടു.