അതിരന്പുഴ തിരുനാളിനു കൊടിയേറി : Deepika.com Nattu Visesham

KOTTAYAM

അതിരന്പുഴ തിരുനാളിനു കൊടിയേറി

Tuesday, January 19, 2021 11:31 PM IST

അതിരന്പുഴ: സെന്‍റ് മേരീസ് ഫൊറോനാ പള്ളിയിൽ വിശുദ്ധ സെബസ്ത്യാനോസിന്‍റെ തിരുനാളിനു കൊടിയേറി. ഇന്നു വിശുദ്ധ സെബസ്ത്യാനോസിന്‍റെ തിരുസ്വരൂപം വിശ്വാസികൾക്ക് പരസ്യവണക്കത്തിനായി പ്രതിഷ്ഠിക്കും. ദേശക്കഴുന്നിനും ഇന്നു തുടക്കമാകും. ഇന്നലെ രാവിലെ വിശുദ്ധ കുർബാനയ്ക്കുശേഷം വികാരി റവ.ഡോ. ജോസഫ് മുണ്ടകത്തിൽ കൊടിയേറ്റി. അസിസ്റ്റന്‍റ് വികാരിമാരായ ഫാ. ജിജോ കുറിയന്നൂർപറന്പിൽ, ഫാ. ലിബിൻ പുത്തൻപറന്പിൽ, ഫാ. ടോം കന്യേക്കോണിൽ എന്നിവർ സഹകാർമികരായിരുന്നു. കൊടിയേറ്റിനെത്തുടർന്ന് ഫാ. ജേക്കബ് ചക്കാത്ര വിശുദ്ധ കുർബാന അർപ്പിച്ചു. ഇന്നലെ വൈകുന്നേരം പ്രസുദേന്തി വാഴ്ചയും പ്രദക്ഷിണവും നടന്നു. കോട്ടയം ടെക്സ്റ്റൈൽസിൽനിന്നുള്ള കഴുന്ന് പ്രദക്ഷിണം ഇന്നലെയായിരുന്നു.
ഇന്ന് ആരംഭിക്കുന്ന ദേശക്കഴുന്നിനും 24ലെ നഗര പ്രദക്ഷിണത്തിനുമായി വാഹനങ്ങളിൽ പ്രത്യേകം സജ്ജമാക്കിയ രഥങ്ങളുടെ വെഞ്ചരിപ്പും വികാരി റവ. ഡോ. ജോസഫ് മുണ്ടകത്തിൽ നിർവഹിച്ചു. ഇന്ന് രാവിലെ 5.45നു ചങ്ങനാശേരി അതിരൂപതാ ചാൻസലർ റവ. ഡോ. ഐസക് ആലഞ്ചേരി വിശുദ്ധ കുർബാന അർപ്പിക്കും. തുടർന്ന് 7.30നു വിശുദ്ധ സെബസ്ത്യാനോസിന്‍റെ തിരുസ്വരൂപം പരസ്യവണക്കത്തിന് പ്രതിഷ്ഠിക്കും. വലിയ പള്ളിയുടെ മദ്ബഹയിൽനിന്നു പുറത്തെടുക്കുന്ന തിരുസ്വരൂപത്തിൽ പരന്പരാഗതമായ സ്വർണാഭരണങ്ങൾ അണിയിച്ച ശേഷം വലിയപള്ളിയുടെ പ്രധാന കവാടത്തിൽ സ്ഥാപിച്ചിരിക്കുന്ന രൂപക്കൂട്ടിൽ പ്രതിഷ്ഠിക്കും. വിശുദ്ധന്‍റെ തിരുസ്വരൂപവുമായി ചെറിയപള്ളിയിലേക്കു പതിവുള്ള പ്രദക്ഷിണം ഇന്ന് ഉണ്ടാകില്ല. തിരുസ്വരൂപം ഫെബ്രുവരി ഒന്നുവരെ വലിയ പള്ളിയുടെ പ്രധാന കവാടത്തിലായിരിക്കും പ്രതിഷ്ഠിച്ചിരിക്കുന്നത്. ചെറിയപള്ളിയിൽ തിരുനാൾ തിരുക്കർമങ്ങൾ ഉണ്ടായിരിക്കില്ല.