ആലപ്പുഴ: ലോക്സഭാ തെരഞ്ഞെടുപ്പ് ഭിന്നശേഷി സൗഹൃദമാക്കുന്നതിന്റെ ഭാഗമായി പോളിംഗ് സ്റ്റേഷനുകളില് എത്തുന്നതിന് പ്രത്യേക ഭിന്നശേഷിക്കാര്ക്കും വയോജനങ്ങള്ക്കും സൗജന്യ യാത്രാ സൗകര്യവും വോട്ടെടുപ്പ് കേന്ദ്രങ്ങളില് റാമ്പ് സൗകര്യം, വീല്ചെയര് സൗകര്യം എന്നിവയും തയാറാക്കും. ലോക്സഭാ തെരഞ്ഞെടുപ്പ് ഭിന്നശേഷി-വയോജന സൗഹൃദമാക്കുന്നതിനായി ജില്ലാ കളക്ടര് അലക്സ് വര്ഗീസിന്റെ അധ്യക്ഷതയില് ചേര്ന്ന യോഗമാണ് തീരുമാനം എടുത്തത്.
ബ്ലോക്ക് തല ഐസിഡിഎസ് ഓഫീസര്മാര് ജില്ലയിലെ മുഴുവന് ബൂത്തുകളും 20ന് മുമ്പ് സന്ദര്ശിച്ച് ഭിന്നശേഷിക്കാര്ക്കുള്ള അടിസ്ഥാന സൗകര്യങ്ങള് ഉറപ്പുവരുത്തണം. ജില്ലയിലെ മുഴുവന് ബൂത്തുകളിലും റാമ്പുകള് ഏര്പ്പെടുത്തും.അലോപ്പതി, ആയുര്വേദ, ഹോമിയോ ആശുപത്രികളില്നിന്ന് വീല്ചെയറുകള് കണ്ടെത്തി ജില്ലാ സാമൂഹിക നീതി ഓഫീസര്ക്ക് റിപ്പോര്ട്ട് ചെയ്യുന്നതിനായി ബന്ധപ്പെട്ട ഡിഎംഒമാരെ ചുമതലപ്പെടുത്തി. സ്പെഷല് സ്കൂള്, ബഡ്സ് സ്കൂളുകളില്നിന്നും വീല് ചെയര് കണ്ടെത്താന് ബന്ധപ്പെട്ട ഉദ്യോഗസ്ഥരെ ചുമതലപ്പെടുത്തി.
ഭിന്നശേഷിക്കാര്ക്കും 85 വയസിനുമേല് പ്രായമുള്ള വയോജനങ്ങള്ക്കും തെരഞ്ഞെടുപ്പ് ദിവസം പോളിംഗ് ബൂത്തില് എത്തിച്ചേര്ന്ന് വോട്ട് രേഖപ്പെടുത്തി തിരികെ പോകുന്നതിനും പൊതുഗതാഗതത്തില് ബന്ധപ്പെട്ട തിരിച്ചറിയല് രേഖകളുടെ അടിസ്ഥാനത്തില് സൗജന്യ യാത്ര അനുവദിക്കും.
പോളിംഗ് ദിവസം പിഎച്ച്സി, സിഎച്ച്സി എന്നിവയുടെ പ്രവര്ത്തനം ആറുമണിവരെ നീട്ടും. ഭിന്നശേഷിക്കാരുടെ വാഹനങ്ങള് പാര്ക്ക് ചെയ്യാന് പ്രത്യേക സൗകാര്യം പോളിംഗ് ബൂത്തിന് സമീപം ഒരുക്കും. തെരഞ്ഞെടുപ്പ് ദിവസം ബൂത്തില് എത്തുന്ന മുതിര്ന്ന പൗരന്മാര്ക്കും ഭിന്നശേഷിക്കാര്ക്കും എസ്പിസി, എന്എസ്എസ്, എന്സിസി വോളന്റിയേഴ്സിന്റെ സേവനം ലഭ്യമാക്കും. മെഡിക്കല് കിറ്റ്, വെള്ളം, പ്രത്യേക ക്യൂ, വെയില് ഏല്ക്കാതെ വോട്ട് ചെയ്യാനുള്ള സൗകര്യം എന്നിവ ഏര്പ്പെടുത്തും.
കളക്ടറേറ്റ് കോണ്ഫറന്സ് ഹാളില് ചേര്ന്ന യോഗത്തില് ജില്ലാ സാമൂഹിക നീതി ഓഫീസറും ഭിന്നശേഷി നോഡല് ഓഫീസറുമായ എ.ഒ.അബീന്, സീനിയര് സൂപ്രണ്ട് എസ്. അന്വര്, ജില്ലാ വനിത ശിശുവികസന ഓഫീസര് എല്, ഷീബ, ജില്ലാ സാമൂഹ്യനീതി വകുപ്പ് സീനിയര് സൂപ്രണ്ട് ദീപു മറ്റ് ഉദ്യോഗസ്ഥര് തുടങ്ങിയവര് പങ്കെടുത്തു.