ആലപ്പുഴ: ജില്ലയിൽ ഇന്ന് ഡെങ്കി ഹർത്താൽ ആചരിക്കും. ഡെങ്കിപ്പനി പടരാനുള്ള സാധ്യതയുടെ പശ്ചാത്തലത്തിലാണിത്. വീടുകൾ, സ്ഥാപനങ്ങൾ, കടകൾ തുടങ്ങിയ സ്ഥലങ്ങളിൽ ഡെങ്കി ഹർത്താലിന്‍റെ ഭാഗമായി ഉറവിട നശീകരണം നടത്തണം. വീടുകളിൽ അലങ്കാരച്ചെടികൾ വച്ചിരിക്കുന്ന പാത്രങ്ങൾ, വെള്ളം ശേഖരിച്ച വയ്ക്കുന്ന പാത്രങ്ങൾ, ഫ്രിഡ്ജിനു പിന്നിലെ ട്രേ, വീടിനു പുറത്തെ ടെറസ്, സൺഷെയ്ഡ്, വെള്ളം ഒഴുകുന്ന പാതകൾ, വീടിനു ചുറ്റുമുള്ള ഉപയോഗശൂന്യമായ വസ്തുക്കൾ, ജല സംഭരണികൾ എന്നിവ കൂത്താടി വിമുക്തമാണെന്ന് ഉറപ്പു വരുത്തണം. സ്വകാര്യ, സർക്കാർ, വിദ്യാഭ്യാസ സ്ഥാപനങ്ങളുടെ ഉള്ളിലും പുറത്തും മഴവെള്ളം കെട്ടി നിൽക്കുന്ന സാഹചര്യങ്ങൾ ഒഴിവാക്കണം. ഇതിന് പുറമേ എല്ലാ വെള്ളിയാഴ്ചകളിലും സ്കൂളുകൾ, ശനിയാഴ്ചകളിൽ സ്ഥാപനങ്ങൾ, ഞായറാഴ്ചകളിൽ വീടുകൾ എന്നിവിടങ്ങളിൽ ഡ്രൈഡേ ആചരിക്കണം.
എടത്വ: പഞ്ചായത്തില്‍ ഇന്ന് ഡെങ്കി ഹര്‍ത്താല്‍ ആചരിക്കും. എടത്വ പഞ്ചായത്തിലെ വീടുകള്‍, സ്ഥാപനങ്ങള്‍ തുടങ്ങി എല്ലാ മേഖലകളിലും കൊതുകളുടെ സമ്പൂര്‍ണ ഉറവിട നശീകരണം നടപ്പിലാക്കേതാണ്. എല്ലാ സര്‍ക്കാര്‍ വകുപ്പുകളും സന്നദ്ധപ്രവര്‍ത്തകര്‍, കുടുംബശ്രീ, ഹരിതകര്‍മസേനാംഗങ്ങള്‍, മതസംഘടനകള്‍, രാഷ്ട്രീയ സംഘടനകള്‍ തുടങ്ങി സമൂഹത്തിലെ മുഴുവന്‍ ജനവിഭാഗങ്ങളും ഡെങ്കി ഹര്‍ത്താലില്‍ പങ്കെടുക്കണമെന്ന് ഗ്രാമ പഞ്ചായത്ത് പ്രസിഡന്‍റ് ആഹ്വാനം ചെയ്തു.
മങ്കൊമ്പ്: മുട്ടാർ പഞ്ചായത്തിൽ ഇന്നു ഡെങ്കി ഹർത്താൽ ആചരിക്കും. ജില്ലയിലാകെയുള്ള ഹർത്താലാചരണത്തിന്‍റെ ഭാഗമായാണ് പഞ്ചായത്തിലെ 13 വാർഡുകളിലും ആചരണം നടത്തുന്നത്. ഹരിതകർമസേന, കുടുംബശ്രീ അംഗങ്ങൾ, രാഷ്ട്രീയ സാമൂഹ്യസംഘടനകൾ എന്നിവർ പ്രതിരോധ പ്രവർത്തനങ്ങളുടെ ഭാഗമാകുമെന്ന് പ്രസിഡന്‍റ് ലിനി ജോളി അറിയിച്ചു.