നൂറുകണക്കിനു ലോഡ് മണൽ എങ്ങോട്ടു പോയി? : Deepika.com Nattu Visesham

പത്തനംതിട്ട: പ്രളയം നേരിടാനുള്ള മുന്നൊരുക്കത്തിന്‍റെ ഭാഗമായി നദികളിൽ കഴിഞ്ഞയിടെ നടന്ന മണൽനീക്കത്തിൽ ദുരുഹത പുകയുന്നു. നദിയിൽ അടിഞ്ഞുകൂടിയ എക്കൽ നീക്കം ചെയ്തെന്നു മാത്രമാണ് അധികൃതരുടെ വിശദീകരണം. എന്നാൽ, എക്കൽ നീക്കിയതിന്‍റെ മറവിൽ വൻതോതിൽ മണൽ വിവിധ ഭാഗങ്ങളിലേക്കു കടത്തിയതായിട്ടാണ് ആക്ഷേപം.

നദികളിൽനിന്നു മണൽ നീക്കുന്നതുമായി ബന്ധപ്പെട്ടുള്ള നിയമവ്യവസ്ഥകൾ തകിടം മറിച്ചാണ് പന്പാനദിയുടെ പല ഭാഗങ്ങളിൽനിന്നും മണൽ കടത്തിയത്. പന്പയുടെ തീരങ്ങളിൽ അടിഞ്ഞുകൂടിയ പുറ്റ് നീക്കി ജലമൊഴുക്ക് സുഗമമാക്കാൻ ചെറുകിട ജലസേചനവകുപ്പ് നേരിട്ട് ഏറ്റെടുത്തതായിരുന്നു പദ്ധതി. 20 ലക്ഷം രൂപയുടെ കരാർ ജോലികൾ ആദ്യഘട്ടത്തിൽ വകുപ്പ് നേരിട്ടു നൽകി.

മണൽ പോയ വഴി

പന്പാനദിക്ക് ഇനിയൊരു പ്രളയം സഹിക്കാൻ ശേഷിയില്ലെന്ന കണ്ടെത്തലിന്‍റെ അടിസ്ഥാനത്തിലാണ് കൈവഴികളും തീരവും തെളിക്കാൻ തീരുമാനിച്ചത്. മണ്ണുമാന്തി യന്ത്രങ്ങൾ ഉപയോഗിച്ചു പുറ്റ് നീക്കി നദിയുടെ വീതി കൂട്ടുകയായിരുന്നു പദ്ധതി. ഇതിനൊപ്പം ലഭിച്ച എക്കൽ കരയിലേക്കു നീക്കി. പഞ്ചായത്തുകളിൽ ഡന്പിംഗ് യാർഡുകൾ കണ്ടെത്തി എക്കൽ അവിടെ നിക്ഷേപിക്കാനായിരുന്നു നിർദേശം. പല ഡന്പിംഗ് യാർഡുകളിലും തുച്ഛമായ തോതിൽ മാത്രമാണ് എക്കൽ നിക്ഷേപിച്ചത്. പകരം വാരിക്കൂട്ടിയ മണൽ പുറംകേന്ദ്രങ്ങളിലേക്കു കടത്തിയതായാണ് വിവരം.

ലേലം വിളിച്ചില്ല

കരാർപ്രകാരം വാരിക്കൂട്ടുന്ന എക്കൽ യാർഡുകളിൽനിന്നു ലേലം ചെയ്യണമെന്നായിരുന്നു വ്യവസ്ഥ. തുടർന്ന് ഇതു ലേലം ചെയ്യാൻ നിർദേശിച്ചിരുന്നു. വില്പനയിലൂടെ ലഭിക്കുന്ന തുകയുടെ 70 ശതമാനം തദ്ദേശസ്ഥാപനത്തിനും 30 ശതമാനം റിവർമാനേജ്മെന്‍റ് ഫണ്ടിലേക്കുമാണ്. എന്നാൽ, എക്കൽനീക്കത്തിന്‍റെ കണക്കുകളൊന്നും തദ്ദേശസ്ഥാപനങ്ങളെ അറിയിച്ചിരുന്നില്ല. ചെറുകോൽ പഞ്ചായത്തിൽ എക്കൽ നീക്കാനായി കാട്ടൂർ റോഡരികിൽ സ്ഥലം നിർദേശിച്ചെങ്കിലും വളരെ കുറച്ചു ലോഡ് മാത്രമാണ് ഇവിടെ നിക്ഷേപിച്ചത്.

മണൽക്കടത്ത്
പലേടത്തും

2018ലെ മഹാപ്രളയത്തിൽ ശബരിമല പന്പയിൽ അടിഞ്ഞുകൂടിയ മണൽ വാരിക്കൂട്ടി നഷ്ടമാക്കിയതിനു പിന്നാലെയാണ് പന്പയുടെ മറ്റു ഭാഗങ്ങളിലും ഇത്തരത്തിൽ നഷ്ടത്തിന്‍റെ കണക്കുകൾ ഉ‍യരുന്നത്. പന്പയിലെ മണൽ രഹസ്യ അജൻഡയിലൂടെ തിരിമറി നടത്താനുള്ള നീക്കമാണ് പൊളിഞ്ഞത്. മണൽ ഇല്ലെന്നും എക്കലാണെന്നും പേരിൽ സർക്കാർ ഏജൻസിയെക്കൊണ്ട് മാറ്റിയ്ക്കാനുള്ള നീക്കമാണ് ഹൈക്കോടതി ഇടപെട്ടു തടഞ്ഞത്. കോടിക്കണക്കിനു രൂപയുടെ മൂല്യമുള്ള മണൽ കടത്താനുള്ള നീക്കമാണ് ഇതിനു പിന്നിലെന്ന് ആരോപിച്ച് അന്നത്തെ പ്രതിപക്ഷ നേതാവ് രമേശ് ചെന്നിത്തലയും കോടതിയിലെത്തിയിരുന്നു. തുടർന്ന് മണൽ നീക്കം പൊളിഞ്ഞു. ഇതു ലേലം ചെയ്തു നൽകണമെന്നാവശ്യവുമായി സർക്കാർ കരാറുകാർ അടക്കം രംഗത്തുവന്നിരുന്നു. എന്നാൽ, ഒന്നുമുണ്ടായില്ല. പന്പയുടെ തീരങ്ങളിലും വനമേഖലയിലുമൊക്കെയായി കൂട്ടിയിട്ട മണൽ നഷ്ടപ്പെടുന്ന അവസ്ഥയായി.

പുറ്റുനീക്കം
പാളുമോ?

നദികളിൽ രൂപപ്പെടുന്ന പുറ്റുകൾ നീക്കുന്നതുകൊണ്ടു കാര്യമായ പ്രയോജനമുണ്ടാകുന്നില്ലെന്നു വിദഗ്ധർ. ഒരു സ്ഥലത്തുനിന്നു പുറ്റു നീക്കിയാൽ മറ്റൊരു ഭാഗത്ത് ഇതു രൂപപ്പെടും. 2018ലെ പ്രളയത്തിനു ശേഷം പന്പാനദിയിൽ വൻ തോതിൽ ചെളിയും മണലും ഒഴുകിയെത്തിയിരുന്നു. ഇതോടെ ആറിന്‍റെ അടിത്തട്ട് ഉ‍യർന്നു.

പന്പാനദിയിലും തീരത്തുമായി പുറ്റുകളും രൂപപ്പെട്ടു. ചെറിയ മഴ പെയ്താലും തീരത്തേക്കു വെള്ളം കയറുന്ന സ്ഥിതിയെത്തി. ഇതിനു പരിഹാരമായാണ് ചെളിനീക്കം ചെയ്യാൻ ജലസേചനവകുപ്പ് പദ്ധതിയിട്ടത്.

കോടികളുടെ നഷ്ടം

റവന്യു വകുപ്പിനു കോടിക്കണക്കിനു രൂപ മുതൽക്കൂട്ടാമായിരുന്ന പദ്ധതിയാണ് പാളിയത്. നദീതീരങ്ങളിൽ ലഭിക്കുന്ന മണൽ നിർമാണമേഖലയ്ക്കു വിലപ്പെട്ടതാണ്. ചെളി നിറഞ്ഞതാണെങ്കിലും ഈ മണൽ സംസ്കരിച്ചെടുക്കാനാകും. ഇത്തരത്തിൽ ലഭിക്കുന്ന മണലിനു വൻവിലയാണ്. എന്നാൽ, ചെളി നീക്കത്തിന്‍റെ മറവിൽ ലഭിച്ച മണൽ പൂർണമായി കടത്തിക്കൊണ്ടു പോയതോടെ നദികളിലെ പുറ്റുനീക്കംകൊണ്ട് സർക്കാർ ഖജനാവിനു നേട്ടമുണ്ടായില്ല.

പന്പയുടെ പല ഭാഗങ്ങളിലും പുറ്റു പോലും നീക്കം ചെയ്യാതെയാണ് മണൽ മാത്രം കടത്തിയതെന്നു പ്രദേശവാസികൾ പറഞ്ഞു. ചെറുകോൽ പഞ്ചായത്തിന്‍റെ പല ഭാഗങ്ങളിലും ഇത്തരത്തിൽ മണൽക്കടത്തിനെതിരേ നാട്ടുകാർ രംഗത്തുവന്നിരുന്നു.