വെള്ളരിക്കുണ്ട്: പൊട്ടിപ്പൊളിഞ്ഞു കുണ്ടും കുഴിയും നിറഞ്ഞ മലയോര ഹൈവേയിലെ റോഡുകളിൽ അപകടങ്ങൾ തുടർക്കഥയാകുമ്പോഴും നിസംഗത പാലിക്കുന്ന അധികൃതരുടെ നടപടിയിൽ പ്രതിഷേധിച്ച് ബളാൽ, വെസ്റ്റ് എളേരി, ഈസ്റ്റ് എളേരി മണ്ഡലം കോൺഗ്രസ് കമ്മിറ്റികളുടെ നേതൃത്വത്തിൽ കാഞ്ഞങ്ങാട് കിഫ്‌ബി ഓഫീസിലേക്ക് മാർച്ചും ധർണയും നടത്തി.
റോഡുകളുടെ അറ്റകുറ്റപണികൾ നടത്തി ഈ മഴക്കാലത്തെ യാത്രദുരിതത്തിന് അടിയന്തരമായി പരിഹരിക്കുവാൻ അധികൃതർ തയാറാവണമെന്നും പോപ്പുലർ എസ്റ്റേറ്റ് ഭാഗത്തെ കയറ്റം കുറച്ച് ബസ് റൂട്ട് ഉൾപ്പെടെ ഉള്ള ചരക്ക് നീക്കങ്ങളും വാഹനങ്ങൾക്ക് സുഗമമാക്കണമെന്നും സോളാർ ലൈറ്റുകൾ സ്‌ഥാപിക്കണമെന്നും ആവശ്യപ്പെട്ടാണ് ധർണ നടത്തിയത്. മാന്തോപ്പ് മൈതാനത്തുനിന്നും പ്രകടനമായിട്ടെത്തിയ കോൺഗ്രസ് പ്രവർത്തകരെ കിഫ്‌ബി ഓഫീസിന് മുന്നിൽ പോലീസ് തടഞ്ഞു.
തുടർന്ന് നടന്ന ധർണ ബളാൽ പഞ്ചായത്ത്‌ പ്രസിഡന്‍റും കർഷകകോൺഗ്രസ് സംസ്ഥാന ജനറൽ സെക്രട്ടറിയുമായായ രാജു കട്ടക്കയം ഉദ്ഘാടനം ചെയ്തു. മലയോര ഹൈവേ കടന്നു പോകുന്ന വഴിയിൽ യാത്രക്കാരും നാട്ടുകാരും നേരിടുന്ന പ്രയാസങ്ങൾ അടിയന്തരമായി പരിഹരിക്കുവാൻ അനുകൂല തീരുമാനം ഉണ്ടായില്ലെങ്കിൽ സമരത്തിന്‍റെ ഗതി മാറുമെന്നും വരുംനാളുകളിൽ മലയോര ഹൈവേ ഉപരോധിച്ചു കൊണ്ടുള്ള പ്രക്ഷോഭ പരിപാടികൾക്ക് കോൺഗ്രസ് പാർട്ടി നേതൃത്വം നൽകുമെന്നും രാജു കട്ടക്കയം പറഞ്ഞു.
ഡിസിസി ജനറൽ സെക്രട്ടറി സെബാസ്റ്റ്യൻ പതാലിൽ അധ്യക്ഷത വഹിച്ചു. ഡിസിസി ജനറൽ സെക്രട്ടറിമാരായ ഹരീഷ് പി.നായർ, വിനോദ്കുമാർ പള്ളയിൽവീട്, ടോമി പ്ലാച്ചേരി, മഹിള കോൺഗ്രസ് സംസ്ഥാന സെക്രട്ടറി മീനാക്ഷി ബാലകൃഷ്ണൻ, ജില്ലാ പഞ്ചായത്തംഗം ജോമോൻ ജോസ്, ബളാൽ മണ്ഡലം കോൺഗ്രസ് പ്രസിഡന്‍റ് എം.പി.ജോസഫ്, ജോയി കിഴക്കരക്കാട്ട്, മാത്യു പടിഞ്ഞാറയിൽ, ജോസഫ് മാത്യു, രാജേഷ് തമ്പാൻ, മാർട്ടിൻ ജോർജ്, ഷോണി ജോർജ്, ബ്ലോക്ക് പഞ്ചായത്തംഗങ്ങളായ ഷോബി ജോസഫ്, സി.രേഖ. ജോസ് കുത്തിയതോട്ടിൽ, അന്നമ്മ മാത്യു എന്നിവർ പ്രസംഗിച്ചു.