നെ​യ്യാ​ർ​ഡാം കു​ന്നി​ൽ മ​ഹാ​ദേ​വ​ക്ഷേ​ത്ര​ത്തി​ലെ ഉ​ത്സ​വ​ം തടഞ്ഞു, സം​ഘ​ർ​ഷം
Saturday, February 22, 2020 12:44 AM IST
കാ​ട്ടാ​ക്ക​ട : നെ​യ്യാ​ർ​ഡാം മ​ര​കു​ന്നം കു​ന്നി​ൽ മ​ഹാ​ദേ​വ​ക്ഷേ​ത്ര​ത്തി​ലെ ഉ​ത്സ​വം സം​ഘ​ർ​ഷ​ത്തി​ൽ ക​ലാ​ശി​ച്ചു. ജ​ല​വി​ഭ​വ വ​കു​പ്പി​ന്‍റെ ഭൂ​മി​യി​ലാ​ണ് ക്ഷേ​ത്ര​മെ​ന്നുപറഞ്ഞ് പൊ​ങ്കാ​ല ഇ​ടാ​നും പൂ​ജ​ന​ട​ത്താ​നും എ​ത്തി​യ​വ​രെ പോ​ലീ​സ് ത​ട​ഞ്ഞ​താണ് സം​ഘ​ർ​ഷ​ത്തിൽ കലാശിച്ചത്. സ്ത്രീ​ക​ൾ ഉ​ൾ​പ്പെ​ടെ​യു​ള്ള​വ​ർ നാ​മ​ജ​പം ന​ട​ത്തി പ്രതിഷേധിച്ച തി നൊടുവിൽ പൊ​ങ്കാ​ല​യും ഇ​ട്ടു. ഇതിനിടെ കാ​ട്ടാ​ക്ക​ട ത​ഹ​സീ​ൽ​ദാ​ർ​ക്കു നേ​രെ കൈ​യേ​റ്റ​മു​ണ്ടാ​യി. സം​ഭ​വു​മാ​യി ബ​ന്ധ​പ്പെ​ട്ട് 200 പേ​ർ​ക്കെ​തി​രെ കേ​സെ​ടു​ത്തു.

ഇ​ന്ന​ലെ രാ​വി​ലെ​യാ​ണ് സം​ഭ​വം. നെ​യ്യാ​ർ​ഡാ​മി​ലെ മ​ര​കു​ന്ന​ത്ത് സിം​ഹ​സ​ഫാ​രി​പാ​ർ​ക്കി​ന​ടു​ത്ത് കു​ന്നി​ൽ മ​ഹാ​ദേ​വ​ക്ഷേ​ത്ര​മു​ണ്ട്. ഇ​വി​ടെ സ്ഥി​ര​മാ​യി നാ​ട്ടു​കാ​ർ പൂ​ജ​യും മ​റ്റും ന​ട​ത്താ​റു​ണ്ട്. ഇ​ന്ന​ലെ ശി​വ​രാ​ത്രി പ്ര​മാ​ണി​ച്ച് സ്ത്രീ​ക​ൾ അ​ട​ക്ക​മു​ള്ള​വ​ർ പൊ​ങ്കാ​ല​യി​ടാ​ൻ എ​ത്തി. ഇ​വ​രെ പോ​ലീ​സ് ത​ട​ഞ്ഞു. തു​ട​ർ​ന്നാ​ണ് സം​ഘ​ർ​ഷം ഉ​ട​ലെ​ടു​ത്ത​ത്.

ഈ ​ക്ഷേ​ത്രം ഇ​രി​ക്കു​ന്ന ഭൂ​മി അ​ടു​ത്തി​ടെ ജ​ല​വി​ഭ​വ​വ​കു​പ്പ് ഏ​റ്റെ​ടു​ത്തി​രു​ന്നു. തി​രു​വ​ന​ന്ത​പു​രം ന​ഗ​ര​ത്തി​ലേ​ക്ക് വെ​ള്ളം എ​ത്തി​ക്കാ​നു​ള്ള പ്ലാ​ന്‍റി​നാ​യി പ​ണി​ക​ൾ ന​ട​ന്നു​വ​രി​ക​യാ​ണ്. ഭൂ​മി ജ​ല അ​ഥോ​റി​റ്റി​ക്ക് കൈ​മാ​റ്റം ചെ​യ്യാ​നു​ള്ള ഉ​ത്ത​ര​വ് ര​ണ്ടു ദി​വ​സം മു​ൻ​പാ​ണ് പു​റ​ത്തി​റ​ങ്ങി​യ​ത്. ശി​വ​രാ​ത്രി ദി​വ​സ​മാ​യ​തി​നാ​ൽ സ്ഥ​ല​ത്ത് പൊ​ങ്കാ​ല ന​ട​ത്തു​മെ​ന്ന് നേ​ര​ത്തെ ത​ന്നെ പ്ര​ഖ്യാ​പി​ച്ചി​രു​ന്നു. ഈ ​ഉ​ത്ത​ര​വ് കി​ട്ടി​യ​തി​നെ തു​ട​ർ​ന്ന് ജ​ല​വി​ഭ​വ​സെ​ക്ര​ട്ട​റി നെ​യ്യാ​ർ​ഡാം പോ​ലീ​സി​ൽ ഉ​ത്സ​വം ന​ട​ത്താ​ൻ നീ​ക്കം ന​ട​ത്തു​ന്ന​താ​യി പ​രാ​തി ന​ൽ​കി​യി​രു​ന്നു. ഇ​തു​നു​സ​രി​ച്ച് പോ​ലീ​സ് ഇ​ന്ന​ലെ രാ​വി​ലെ മു​ത​ൽ ഇ​വി​ടെ ത​മ്പ​ടി​ക്കു​ക​യും ക്ഷേ​ത്ര ഭാ​ര​വാ​ഹി​ക​ളെ വി​വ​രം അ​റി​യി​ക്കു​ക​യും ചെ​യ്തി​രു​ന്നു. എ​ന്നാ​ൽ സ്ത്രീ​ക​ൾ അ​ട​ക്ക​മു​ള്ള​വ​ർ ക്ഷേ​ത്ര​ത്തി​ൽ എ​ത്തു​ക​യും പൊ​ങ്കാ​ല​യി​ടാ​ൻ ശ്ര​മി​ക്കു​ക​യും ചെ​യ്ത​പ്പോ​ൾ പോ​ലീ​സ് ത​ട​യു​ക​യാ​യി​രു​ന്നു. ഇ​തി​നി​ടെ എ​ക്‌​സി​ക്യൂ​ട്ടീ​വ് മ​ജി​സ്‌​ട്രേ​റ്റ് കൂ​ടി​യാ​യ കാ​ട്ടാ​ക്ക​ട ലാ​ൻ​ഡ്അ​ക്വി​സി​ഷ​ൻ ത​ഹ​സീ​ൽ​ദാ​ർ മ​ധു​സൂ​ധ​ൻ എ​ത്തി. തു​ട​ർ​ന്നാ​ണ് ത​ഹ​സീ​ൽ​ദാ​ർ​ക്കു​നേ​രെ കൈ​യേ​റ്റ​മു​ണ്ടാ​യ​ത്.

വ​ർ​ഷ​ങ്ങ​ളാ​യി ത​ങ്ങ​ൾ പൂ​ജ ചെ​യ്യു​ന്ന ക്ഷേ​ത്ര​മാ​ണി​തെ​ന്നും ശി​വ​രാ​ത്രി ദി​വ​സം പൂ​ജ സ്ഥി​ര​മാ​യി ചെ​യ്യാ​റു​ണ്ടെ​ന്നും നാ​ട്ടു​കാ​ർ പ​റ​ഞ്ഞു. ര​ണ്ടു ദി​വ​സം മു​ൻ​പ് ഉ​ത്ത​ര​വി​റ​ക്കി, ക്ഷേ​ത്ര​സ്ഥ​ലം കൈ​മാ​റി​യ​തി​നു പി​ന്നി​ൽ ഉ​ത്സ​വം ത​ട​സ​പ്പെ​ടു​ത്താ​നു​ള്ള ചി​ല​രു​ടെ ശ്ര​മ​മാ​ണെ​ന്നും ഭാ​ര​വാ​ഹി​ക​ൾ പ​റ​ഞ്ഞു. ഇ​തി​നി​ടെ സ്ത്രീ​ക​ൾ നാ​മ​ജ​പം തു​ട​ങ്ങി. പി​ന്നീ​ട് പൊ​ങ്കാ​ല​യി​ടു​ക​യും ചെ​യ്തു. ഭ​ര​ണ​ക​ക്ഷി​യി​ലെ ചി​ല​രു​ടെ താ​ത്പ​ര്യ​മാ​ണ് ഇ​വി​ടെ ന​ട​പ്പി​ലാ​ക്കി​യ​തെ​ന്നു ഭാ​ര​വാ​ഹി​ക​ൾ ആ​രോ​പി​ച്ചു. ഔ​ദ്യോ​ഗി​ക ജോ​ലി ത​ട​സ​പ്പെ​ടു​ത്തി​യ​തി​നും ക​ലാ​പ​ശ്ര​മ​ത്തി​നും ജാ​മ്യ​മി​ല്ലാ വ​കു​പ്പ് പ്ര​കാ​രം 200 പേ​ർ​ക്കെ​തി​രെ നെ​യ്യാ​ർ​ഡാം പോ​ലീ​സ് കേ​സെ​ടു​ത്തു. ഡി​വൈ​എ​സ്പി സ്റ്റു​വ​ർ​ട്ട് കീ​ല​റു​ടെ നേ​തൃ​ത്വ​ത്തി​ൽ പോ​ലീ​സ് സം​ഘം സ്ഥ​ല​ത്ത് ക്യാ​മ്പ് ചെ​യ്യു​ന്നു.