കൊച്ചി വാട്ടർ മെട്രോയ്ക്ക് പുതിയ രണ്ട് ടെർമിനലുകൾകൂടി
Wednesday, October 8, 2025 7:54 PM IST
കൊച്ചി: കൊച്ചി വാട്ടർ മെട്രോയ്ക്ക് പുതിയ രണ്ട് ടെർമിനലുകൾകൂടി. മട്ടാഞ്ചേരി, വില്ലിംഗ്ഡണ് ഐലന്റ് ടെര്മിനലുകളാണ് ഉദ്ഘാടനത്തിന് ഒരുങ്ങിയിരിക്കുന്നത്. വ്യാഴാഴ്ച രാവിലെ മുഖ്യമന്ത്രി പിണറായി വിജയന് ടെർമിനലുകൾ ഉദ്ഘാടനം ചെയ്യും.
മട്ടാഞ്ചേരി ടെര്മിനലില് നടക്കുന്ന ചടങ്ങില് മന്ത്രി പി. രാജീവ് അധ്യക്ഷനായിരിക്കും. 38 കോടി രൂപ ചിലവിലാണ് രണ്ട് ടെര്മിനലുകളും പണികഴിപ്പിച്ചത്. ഇതോടെ വാട്ടര് മെട്രോ ടെര്മിനലുകളുടെ എണ്ണം 12 ആയി.
8,000 ചതുരശ്രയടി വലിപ്പത്തിലുള്ള മട്ടാഞ്ചേരി ടെര്മിനല് ഡെച്ച് പാലസിന് തൊട്ടടുത്താണ്. പഴയ ഫെറി ടെര്മിനലിന് അടുത്താണ് 3000 ചതുരശ്രയടി വിസ്തീര്ണമുള്ള വില്ലിംഗ്ഡണ് ഐലന്റ് ടെര്മിനല്. രണ്ട് ടെര്മിനലുകളും പൂര്ണമായും വെള്ളത്തിലാണ് നിര്മിച്ചിരിക്കുന്നത്.