വാഹനം എലിവേറ്റഡ് ഹൈവേയിലെ തൂണിലിടിച്ച് യുവാവ് മരിച്ചു; രണ്ട് പേരുടെ നില ഗുരുതരം, അപകടം റേസിംഗിനിടെയെന്ന് സംശയം
Sunday, August 31, 2025 7:27 AM IST
തിരുവനന്തപുരം: കഴക്കൂട്ടത്ത് ടെക്നോപാർക്കിന് സമീപം നിയന്ത്രണംവിട്ട വാഹനം എലിവേറ്റഡ് ഹൈവേയിലെ തൂണിൽ ഇടിച്ചുണ്ടായ അപകടത്തിൽ ഒരാൾ മരിച്ചു. ബാലരാമപുരം സ്വദേശി ഷിബിൻ (28) ആണ് മരിച്ചത്. അപകടത്തിൽ ഒരു യുവതിയടക്കം രണ്ട് പേരുടെ നില ഗുരുതരമായി തുടരുന്നു.
അമിത വേഗതയിലായിരുന്ന ഥാർ വാഹനമാണ് അപകടത്തിൽപ്പെട്ടത്. റേസിംഗിനിടെയാണ് അപകടം ഉണ്ടായതെന്ന സംശയം പോലീസിനുണ്ട്. ഈ സംഘത്തിൽ മറ്റു വാഹനങ്ങളും ഉണ്ടായിരുന്നതായി വാഹനയാത്രികർ പറയുന്നു. അപകടത്തിൽ വാഹനത്തിന്റെ മുൻഭാഗം പൂർണമായും തകർന്നു.
വാഹനം ഓടിച്ചിരുന്ന ബാലരാമപുരം സ്വദേശി ഷിബിനൊപ്പം മാരായമുട്ടം സ്വദേശി രജനീഷ് (27), പോങ്ങുംമൂട് സ്വദേശി കിരൺ (29), സിവിആർ പുരം സ്വദേശിനി അഖില (28), കൈമനം സ്വദേശിനി ശ്രീലക്ഷ്മി (23) എന്നിവരാണ് വാഹനത്തിൽ ഉണ്ടായിരുന്നത്. രാത്രി 12 ഓടെയാണ് അപകടം ഉണ്ടായത്. ഇവർ മദ്യലഹരിയിലായിരുന്നതായാണ് വിവരം. അപകട സ്ഥലത്ത് പോലീസും നാട്ടുകാരും ചേർന്നാണ് രക്ഷാപ്രവർത്തനം നടത്തിയത്. എല്ലാവരെയും ഉടൻ മെഡിക്കൽ കോളജ് ആശുപത്രിയിലെത്തിച്ചു. സംഭവത്തിൽ കഴക്കൂട്ടം പോലീസ് കേസെടുത്തു.