കരുനാഗപ്പള്ളി സന്തോഷ് വധം; മുഖ്യസൂത്രധാരൻ പങ്കജ് പിടിയിൽ
Wednesday, April 2, 2025 7:11 AM IST
കൊല്ലം: കരുനാഗപ്പള്ളിയിലെ ഗുണ്ടാ നേതാവ് ജിം സന്തോഷ് വധക്കേസിൽ മുഖ്യസൂത്രധാരൻ പങ്കജ് പിടിയിൽ.
ഇന്ന് പുലര്ച്ചെ 3.45 ഓടെ കല്ലമ്പലത്ത് നിന്നുമാണ് പ്രതിയെ പോലീസ് പിടികൂടിയത്. പങ്കജിന്റെ ക്വട്ടേഷൻ പ്രകാരമാണ് കൊലപാതകമെന്നാണ് പോലീസ് നിഗമനം.
കരുനാഗപ്പള്ളി പോലീസിന്റെ സ്പെഷ്യല് ടീം കല്ലമ്പലത്ത് തിങ്കളാഴ്ച മുതല് ക്യാമ്പ് ചെയ്യുന്നുണ്ടായിരുന്നു. തുടര്ന്ന് ഇന്ന് പുലര്ച്ചയോടെ പ്രതിയെ പിടികൂടുകയായിരുന്നു.
പ്രതിയെ കരുനാഗപ്പള്ളി പോലീസ് സ്റ്റേഷനില് എത്തിച്ചു. ഉന്നത ഉദ്യോഗസ്ഥരുടെ സാന്നിധ്യത്തില് ചോദ്യം ചെയ്യും.
കൊലപാതകം ആസൂത്രണം ചെയ്യുന്നതിലുള്പ്പെടെ പങ്കജിന് പങ്കുണ്ടെന്നാണ് പോലീസിന്റെ കണ്ടെത്തല്. സാക്ഷി മൊഴികളും പോലീസിന് ലഭിച്ചിട്ടുണ്ട്. പങ്കജിനെ ചോദ്യം ചെയ്യുന്നതോടെ കേസിലെ മുഖ്യപ്രതിയായ അലുവ അതുലിനെ കണ്ടെത്താനും കഴിയുമെന്നാണ് പോലീസ് പ്രതീക്ഷിക്കുന്നത്.