വ്ളോഗർ ജുനൈദ് വാഹനാപകടത്തിൽ മരിച്ച സംഭവം; അസ്വാഭാവികതയുണ്ടോയെന്ന് പരിശോധിക്കും
Saturday, March 15, 2025 12:57 PM IST
മലപ്പുറം: മഞ്ചരിയിലുണ്ടായ വാഹനാപകടത്തിൽ വ്ളോഗർ ജുനൈദ് മരിച്ച സംഭവത്തിൽ അസ്വാഭാവികത ഉണ്ടോയെന്ന് മഞ്ചേരി പോലീസ് അന്വേഷണം ആരംഭിച്ചു. സ്ഥലത്തെ സിസിടിവി ദൃശ്യങ്ങൾ പോലീസ് പരിശോധിക്കും.
ജുനൈദ് അപകടകരമായ രീതിയിൽ വാഹനം ഓടിക്കുന്നെന്ന് ഒരാൾ പോലീസ് കൺട്രോൾ റൂമിലേക്ക് അറിയിച്ചിരുന്നു. ഇയാളുടെ മൊഴിയടക്കം രേഖപ്പെടുത്തും. അതേസമയം മരണത്തിൽ ജുനൈദിന്റെ കുടുംബം പരാതി നൽകിയിട്ടില്ല.
വെള്ളിയാഴ്ച വൈകുന്നേരം മഞ്ചേരിയില് നിന്ന് വഴിക്കടവ് ഭാഗത്തേക്ക് വരുമ്പോഴായിരുന്നു അപകടം. റോഡരികിലെ മണ്കൂനയില് തട്ടി ബൈക്ക് മറിഞ്ഞാണ് അപകടമുണ്ടായത്.
റോഡരികില് രക്തം വാർന്ന നിലയില് കിടക്കുന്ന ജുനൈദിനെ ബസ് ജീവനക്കാരാണ് ആദ്യം കണ്ടത്.
മഞ്ചേരി മെഡിക്കല് കോളജ് ആശുപത്രിയില് പ്രവേശിപ്പിച്ചെങ്കിലും ജീവൻ രക്ഷിക്കാൻ കഴിഞ്ഞില്ല.