ഇഡി ഉദ്യോഗസ്ഥന് ചമഞ്ഞ് തട്ടിപ്പ്; എഎസ്ഐക്ക് സസ്പെൻഷൻ
Monday, February 17, 2025 3:09 PM IST
തൃശൂര്‍: ഇഡി ഉദ്യോഗസ്ഥന് ചമഞ്ഞ് കര്‍ണാടകയിലെ വ്യവസായിയെ പറ്റിച്ച് നാല് കോടി രൂപ തട്ടിയ സംഭവത്തില്‍ എഎസ്ഐക്ക് സസ്‌പെന്‍ഷന്‍. കൊടുങ്ങല്ലൂര്‍ പോലീസ് സ്‌റ്റേഷനിലെ എഎസ്ഐ ഷഫീര്‍ ബാബുവിനെ ആണ് സസ്‌പെന്‍ഡ് ചെയ്തത്. തൃശൂര്‍ റൂറല്‍ എസ്പി ബി.കൃഷ്ണകുമാറിന്‍റേതാണ് ഉത്തരവ്.
മറ്റ് രണ്ട് പേർക്കൊപ്പമെത്തി ഇഡി ഉദ്യോഗസ്ഥനാണെന്ന് പറഞ്ഞാണ് എഎസ്ഐ കോടികൾ തട്ടിയത്. കര്‍ണാടക പോലീസ് കേരളത്തിലെത്തിയാണ് ഷഫീർ ബാബു ഉൾപ്പെടെയുള്ള മൂന്നംഗ സംഘത്തെ കസ്റ്റഡിയിലെടുത്തത്.
ഷഫീറിനെയും സംഘത്തേയും കൂടുതൽ അന്വേഷണത്തിനായി കർണാടകയിലേക്ക് കൊണ്ടുപോയിരുന്നു. ഇതിന് പിന്നാലെയാണ് എഎസ്ഐക്കെതിരേ നടപടിയെടുത്തത്.