പാലക്കാട്ടെ എൽഡിഎഫ് - യുഡിഎഫ് ഡീൽ ഇത്തവണ പൊളിയും: കെ.സുരേന്ദ്രന്
Monday, October 21, 2024 8:07 PM IST
ന്യൂഡൽഹി: പാലക്കാട് ഇത്തവണയും എൽഡിഎഫ് - യുഡിഎഫ് ഡീലുണ്ടെന്നും അത് പൊളിയുമെന്നും ബിജെപി സംസ്ഥാന അധ്യക്ഷൻ കെ.സുരേന്ദ്രന്. കഴിഞ്ഞ നിയമസഭാ തെരഞ്ഞെടുപ്പില് എല്ഡിഎഫിന്റെ വോട്ട് യുഡിഎഫിന് മറിച്ചു എന്ന ആരോപണം ഉന്നയിച്ചത് ഇപ്പോഴത്തെ എൽഡിഎഫ് സ്ഥാനാർഥിയാണ്.
മുഖ്യമന്ത്രി പിണറായി വിജയനോ സിപിഎം സംസ്ഥാന സെക്രട്ടറി എം.വി.ഗോവിന്ദനോ ഈകാര്യത്തിൽ പ്രതികരിക്കാന് തയാറാകാത്തത് വസ്തുതകളെ അംഗീകരിക്കലാണെന്ന് കെ.സുരേന്ദ്രന് പറഞ്ഞു. ഷാഫി പറമ്പിലിന് എല്ഡിഎഫ് വോട്ട് മറിച്ചെന്ന ആരോപണം ഉന്നയിച്ചിരിക്കുന്നത് അന്നത്തെ കോണ്ഗ്രസ് നേതാവ് കൂടിയായ ഇപ്പോഴത്തെ എല്ഡിഎഫിന്റെ സ്ഥാനാര്ഥിയാണ്.
ഇത്ര ഗൗരവമുള്ള ആരോപണം ഉന്നയിച്ചിട്ടും സിപിഎം നേതൃത്വം പ്രതികരിക്കാന് തയാറായിട്ടില്ല. തെരഞ്ഞെടുപ്പ് ഫലം വന്ന ദിവസം തന്നെ എ.കെ.ബാലന് പറഞ്ഞത് പാലക്കാട്ടെ എല്ഡിഎഫ് പ്രവര്ത്തകര് ശരിയായ തീരുമാനം എടുത്തു എന്നാണ്. അന്നത്തെ ഷാഫി പറമ്പിലിന്റെ വിജയാഘോഷത്തില് പങ്കുചേര്ന്നത് യുഡിഎഫ് നേതാക്കളെക്കാള് എല്ഡിഎഫ് പ്രവര്ത്തകരാണെന്നും ബിജെപി സംസ്ഥാന അധ്യക്ഷൻ പറഞ്ഞു.