ഉപതെരഞ്ഞെടുപ്പ്; ബിജെപി സ്ഥാനാർഥികളെ പ്രഖ്യാപിച്ചു
Saturday, October 19, 2024 7:51 PM IST
ന്യൂഡൽഹി : പാലക്കാട്, ചേലക്കര, വയനാട് ഉപതെരഞ്ഞെടുപ്പിനുള്ള ബിജെപി സ്ഥാനാർഥികളെ പ്രഖ്യാപിച്ചു. പാലക്കാട് സി.കൃഷ്ണകുമാറും ചേലക്കരയിൽ കെ.ബാലകൃഷ്ണനും വയനാട്ടിൽ നവ്യ ഹരിദാസും ജനവിധി തേടും. കഴിഞ്ഞ ലോക്സഭാ തെരഞ്ഞെടുപ്പിൽ പാലക്കാട് മണ്ഡലത്തിൽ ബിജെപി സ്ഥാനാർഥിയായിരുന്നു കൃഷ്ണകുമാർ.
നിയമസഭാ തെരഞ്ഞെടുപ്പിൽ മലമ്പുഴ മണ്ഡലത്തിൽ നിന്നും ഇദ്ദേഹം മത്സരിച്ചിരുന്നു. നിലവിൽ കോഴിക്കോട് കോര്പ്പറേഷന് കൗണ്സിലറാണ് നവ്യ. കഴിഞ്ഞ നിയമസഭാ തെരഞ്ഞെടുപ്പിൽ കോഴിക്കോട് സൗത്ത് മണ്ഡലത്തിൽ നിന്ന് നവ്യ മത്സരിച്ചിരുന്നു. തിരുവില്വാമല പഞ്ചായത്തംഗമാണ് കെ.ബാലകൃഷ്ണൻ.
ഡൽഹിയിൽ ബിജെപി പാർലമെന്ററി ബോർഡ് യോഗം ചേർന്ന ശേഷമാണ് സ്ഥാനാർഥികളെ പ്രഖ്യാപിച്ചത്. വയനാട് ലോക്സഭാ മണ്ഡലത്തിൽ എഐസിസി ജനറൽ സെക്രട്ടറി പ്രയങ്ക ഗാന്ധിയാണ് യുഡിഎഫ് സ്ഥാനാർഥി. സത്യൻ മൊകേരിയാണ് എൽഡിഎഫിനായി മത്സരിക്കുന്നത്.
പാലക്കാട് മണ്ഡലത്തിൽ കോൺഗ്രസ് വിട്ടുവന്ന ഡോ.പി.സരിനും ചേലക്കരയിൽ മുൻ എംഎൽഎ യു.ആർ.പ്രദീപും ഇടതു മുന്നണിക്കായി മത്സരിക്കും. യുഡിഎഫിനായി രാഹുൽ മാങ്കൂട്ടത്തില് പാലക്കാടും രമ്യഹരിദാസ് ചേലക്കരയിലും മത്സരിക്കും.