ബംഗളൂരു ടെസ്റ്റ്; കിവീസിന് 107 റൺസ് വിജയലക്ഷ്യം
Saturday, October 19, 2024 4:56 PM IST
ബംഗളൂരു: ന്യൂസിലന്ഡിനെതിരായ ആദ്യ ടെസ്റ്റിന്റെ രണ്ടാം ഇന്നിംഗ്സിൽ ഇന്ത്യ 462 റൺസിന് പുറത്ത്. ഒരു ദിവസവും പത്തു വിക്കറ്റും കൈയിലിരിക്കെ കിവീസിന് വിജയിക്കാൻ 107 റൺസ് വേണം.
സെഞ്ചുറി നേടിയ സർഫറാസ് ഖാന്റെയും ഒരു റൺ അകലെ വച്ച് സെഞ്ചുറി നഷ്ടമായ ഋഷഭ് പന്തിന്റെയും പിൻബലത്തിലാണ് ഇന്ത്യ 462 റൺസിലെത്തിയത്. 150 റൺസെടുത്ത സർഫറാസാണ് ടോപ് സ്കോറർ. നാലാം ടെസ്റ്റ് കളിക്കുന്ന സർഫറാസിന്റെ കന്നി ടെസ്റ്റ് സെഞ്ചുറിയാണിത്.
നാലാം ദിനം ചായക്ക് പിരിയുമ്പോള് ആറ് വിക്കറ്റ് നഷ്ടത്തില് 438 റണ്സെന്ന നിലയിലായിരുന്നു ഇന്ത്യ. വിരാട് കോഹ്ലി(70), രോഹിത് ശര്മ(52),യശസ്വി ജയ്സ്വാള് (35) എന്നിവരും ഇന്ത്യയ്ക്കായി മികച്ച പ്രകടനം നടത്തി.
54 റണ്സെടുക്കുന്നതിനിടെയാണ് ഇന്ത്യക്ക് അവസാന ആറ് വിക്കറ്റുകള് നഷ്ടമായത്. കിവീസിനയി മാറ്റ് ഹെന്റിയും വില്യം ഔറൂക്കെയും മൂന്ന് വിക്കറ്റ് വീതം വീഴ്ത്തിയപ്പോള് അജാസ് പട്ടേല് രണ്ട് വിക്കറ്റെടുത്തു.ഗ്ലെന് ഫിലിപ്സും ടിം സൗത്തിയും ഓരോ വിക്കറ്റ് വീതം വീഴ്ത്തി.