എഡിഎമ്മിന്റെ മരണം; ദിവ്യക്കെതിരെ നടപടി വേണമെന്ന് കെ.പി. ഉദയഭാനു
Saturday, October 19, 2024 4:37 PM IST
പത്തനംതിട്ട: എഡിഎം നവീൻ ബാബുവിന്റെ മരണത്തിൽ ആരോപണം നേരിടുന്ന പി.പി.ദിവ്യക്കെതിരെ രൂക്ഷവിമർശനവുമായി സിപിഎം പത്തനംതിട്ട ജില്ലാ സെക്രട്ടറി കെ.പി. ഉദയഭാനു. പി.പി.ദിവ്യക്കെതിരെ സംഘടനാ നടപടി വേണമെന്നും അദ്ദേഹം ആവശ്യപ്പെട്ടു.
കണ്ണൂർ ജില്ലാ കളക്ടർ ഉത്തരവാദിത്തം നിറവേറ്റിയിട്ടില്ല. സ്വകാര്യ യാത്രയയപ്പ് ചടങ്ങിൽ മാധ്യമങ്ങൾ പങ്കെടുക്കരുതായിരുന്നു. ദിവ്യയുടെ പെരുമാറ്റം പൊതുപ്രവർത്തകർക്ക് ഒരു പാഠമാകണമെന്നും പാർട്ടി ജനതാത്പര്യത്തിന് ഒപ്പമാണെന്നും ഉദയഭാനു പറഞ്ഞു.
പി.പി. ദിവ്യയെ അവിശ്വസിക്കേണ്ടെന്ന ഡിവൈഎഫ്ഐ നിലപാടും ഉദയഭാനു തള്ളി. അതേസമയം പി.പി.ദിവ്യക്കെതിരെ സംഘടനാ നടപടി ഉടൻ ഉണ്ടാവില്ലെന്നാണ് പാർട്ടി തീരുമാനം. ജില്ലാ പഞ്ചായത്ത് പ്രസിഡന്റ് എന്ന നിലയിൽ വീഴ്ച വരുത്തിയപ്പോഴാണ് നടപടി സ്വീകരിച്ചതെന്ന് പാർട്ടി വ്യക്തമാക്കി.