കുമരകത്ത് നിയന്ത്രണം വിട്ട കാർ ആറ്റിലേക്കു മറിഞ്ഞു ; രണ്ടുപേർ മരിച്ചു
Monday, September 23, 2024 9:49 PM IST
കോട്ടയം: കുമരകം കൈപ്പുഴമുട്ടിൽ നിയന്ത്രണം വിട്ട കാർ ആറ്റിലേക്ക് മറിഞ്ഞ് രണ്ടുപേർ മരിച്ചു. കൈപ്പുഴമുട്ട് പാലത്തിനു സമീപമുണ്ടായ അപകടത്തിൽ കാറിൽ ഉണ്ടായിരുന്ന മഹാരാഷ്ട്ര സ്വദേശികളാണ് മരിച്ചത്.
തിങ്കളാഴ്ച വൈകുന്നേരം 8.45 നായിരുന്നു സംഭവം. കോട്ടയം ഭാഗത്തുനിന്നും വന്ന കാർ കൈപ്പുഴമുട്ട് പാലത്തിന്റെ ഇടതുവശത്തെ സർവീസ് റോഡ് വഴി നേരെ ആറ്റിലേക്ക് വീഴുകയായിരുന്നുവെന്ന് നാട്ടുകാർ പറഞ്ഞു.
കാറിൽ ഉണ്ടായിരുന്നവരുടെ നിലവിളികേട്ടാണ് നാട്ടുകാർ വിവരം അറിയുന്നത്. നാട്ടുകാരുടെ നേതൃത്വത്തിൽ നടത്തിയ തെരച്ചിലിൽ കാർ കണ്ടെത്തിയിരുന്നു. ചെളി നിറഞ്ഞ നിലയിലായിരുന്നു കാർ. തുടർന്ന് ഫയർഫോഴ്സ് നടത്തിയ തെരച്ചിലിലാണ് ഇരുവരെയും കണ്ടെത്തിയത്.
ഉടൻ തന്നെ ഇവരെ ആശുപത്രിയിൽ പ്രവേശിപ്പിച്ചെങ്കിലും ജീവൻ രക്ഷിക്കാനായില്ല. മൃതദേഹം പോസ്റ്റ്മോർട്ടത്തിനായി മെഡിക്കൽകോളജ് ആശുപത്രിയിലേക്ക് മാറ്റി. പോലീസ് അന്വേഷണം ആരംഭിച്ചു.