"എം.എം. ലോറൻസിന്റെ മൃതദേഹം മെഡിക്കൽ കോളജിന് കൈമാറരുത്': മകൾ ഹൈക്കോടതിയിൽ
Monday, September 23, 2024 2:24 PM IST
കൊച്ചി: അന്തരിച്ച സിപിഎം നേതാവ് എം.എം. ലോറൻസിന്റെ മൃതദേഹം മെഡിക്കൽ കോളജിന് കൈമാറുന്നതിനെതിരേ മകൾ ആശ ഹൈക്കോടതിയെ സമീപിച്ചു. ലോറൻസിന്റെ മൃതദേഹം ആശുപത്രിക്ക് കൈമാറാൻ പിതാവ് പറഞ്ഞിരുന്നില്ലെന്നാണ് ഹർജിയിൽ ചൂണ്ടിക്കാട്ടിയത്. ഹർജി ഹൈക്കോടതി ഉച്ചയ്ക്ക് ശേഷം പരിഗണിക്കും.
വാർത്തയിലൂടെയാണ് അച്ഛന്റെ മൃതദേഹം കളമശേരി ആശുപത്രിക്ക് കൈമാറുന്ന വിവരം അറിയുന്നത്. മൃതദേഹം വൈദ്യപഠനത്തിന് നൽകാൻ തനിക്ക് താത്പര്യമില്ലെന്നും അതുകൊണ്ട് തന്നെ ഇതിൽ കോടതി ഇടപെടണമെന്നുമാണ് മകൾ പറയുന്നത്.
ലോറൻസിന്റെ മൃതദേഹം ഇന്ന് കളമശേരി മെഡിക്കൽ കോളജിന് കൈമാറുമെന്നാണ് നേരത്തെ അറിയിച്ചിരുന്നത്. മൃതദേഹം രാവിലെ ഏഴര മുതൽ വീട്ടിൽ പൊതുദർശനത്തിന് വച്ചിരിക്കുകയാണ്. സിപിഎം ജില്ലാ കമ്മിറ്റി ഓഫീസായ ലെനിൻ സെന്ററിൽ എത്തിച്ച ശേഷം, വൈകുന്നേരം നാലുവരെ എറണാകുളം ടൗൺ ഹാളിലും പൊതുദർശനം ഉണ്ടാകും.