ബിഎംഡബ്ലു കാര് ഇടിച്ച് സ്ത്രീ മരിച്ച സംഭവം: ശിവസേന നേതാവിന്റെ മകന് ഒളിവില്
Monday, July 8, 2024 2:57 PM IST
മുംബൈ: വോര്ളിയില് അമിതവേഗത്തിലെത്തിയ ബിഎംഡബ്ല്യു കാര് ഇടിച്ച് 45കാരി മരിച്ച സംഭവത്തില് പ്രതിയെന്ന് സംശയിക്കുന്ന ശിവസേന നേതാവിന്റെ മകന് ഒളിവില്. ശിവസേന ഷിന്ഡെ വിഭാഗം നേതാവ് രാജേഷ് ഷായുടെ മകന് മിഹിര് ഷായാണ് ഒളിവില് പോയത്.
കാര് ഉടമകൂടിയായ രാജേഷ് ഷായെ പോലീസ് കഴിഞ്ഞ ദിവസം അറസ്റ്റ് ചെയ്തിരുന്നു. മിഹിര് ഷായ്ക്കായുള്ള അന്വേഷണം നടക്കുന്നുണ്ടെന്നും എത്രയും വേഗം കണ്ടെത്താനാകുമെന്നുമാണ് പോലീസ് അറിയിച്ചത്. മിഹിറിനെ കണ്ടെത്താനാന് ആറു ടീമുകളെ നിയോഗിച്ചിട്ടുണ്ടെന്നും രാജ്യം വിടാതെ ഇരിക്കാന് ലൂക്ക്ഔട്ട് നോട്ടീയ് പതിച്ചിട്ടുണ്ടെന്നും പോലീസ് അറിയിച്ചിട്ടുണ്ട്.
കാവേരി നഖാവ് എന്ന സ്ത്രീയാണ് മരിച്ചത്. കഴിഞ്ഞ ദിവസം പുലര്ച്ചെ 5.30 ഓടെയായിരുന്നു സംഭവം. മത്സ്യത്തൊഴിലാളികളും ദമ്പതിമാരുമായ പ്രദീപ് നഖാവും കാവേരി നഖാവും സാസൂണ് ഡോക്കില്നിന്ന് മത്സ്യവും വാങ്ങി തിരികെ പോകും വഴി കോലിവാഡയില് വെച്ചായിരുന്നു അപകടത്തില്പ്പെടുന്നത്.
അമിത വേഗത്തിലെത്തിയ കാര്, ബൈക്കില് ഇടിച്ചതോടെ ബൈക്കിന്റെ നിയന്ത്രണം നഷ്ടപ്പെട്ടു. ഉടന് തന്നെ പ്രദീപ് നഖാവ് ബൈക്കില്നിന്ന് ചാടിയിറങ്ങി. എന്നാല് കൈയില് അമിതഭാരം ഉണ്ടായിരുന്നതിനാല് കാവേരിക്ക് ഒന്നും ചെയ്യാന് സാധിച്ചില്ല. ഉടന് തന്നെ കാവേരിയെ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല.