പിഎസ്സി അംഗത്വം വാഗ്ദാനം ചെയ്ത് കോഴ; സിപിഎം അന്വേഷണം ആരംഭിച്ചു
Sunday, July 7, 2024 6:37 PM IST
തിരുവനന്തപുരം: സിപിഎം നേതാവ് പിഎസ്സി അംഗത്വം വാഗ്ദാനം ചെയ്ത് കോഴ വാങ്ങിയെന്ന പരാതിയിൽ പാർട്ടി അന്വേഷണം ആരംഭിച്ചു. മന്ത്രി മുഹമ്മദ് റിയാസ് വഴി കാര്യം നടത്താമെന്ന ഉറപ്പിൽ 60 ലക്ഷം രൂപയ്ക്കാണ് പദവി ഉറപ്പിച്ചത്. ആദ്യ ഗഡുവായി 22 ലക്ഷം രൂപ യുവനേതാവിന് നൽകിയെന്ന് പാര്ട്ടിക്ക് നൽകിയ പരാതിയിൽ പറയുന്നു.
കോഴിക്കോട് സ്വദേശിയും ആരോഗ്യ മേഖലയിൽ പ്രവര്ത്തിക്കുന്ന ഒരാളാണ് പരാതിക്കാരൻ. പിഎസ്സി അംഗങ്ങളെ തീരുമാനിച്ചപ്പോൾ ഈ വ്യക്തിയുടെ പേര് ഉൾപ്പെട്ടിരുന്നില്ല. ഇതോടെ ആയുഷ് വകുപ്പിൽ സ്ഥാനം വാഗ്ദാനം ചെയ്ത് ഇദ്ദേഹത്തെ അനുനയിപ്പിച്ചു. ഇതും നടക്കാതെവന്നതോടെയാണ് പാര്ട്ടിക്ക് പരാതി നൽകിയത്.
പരാതിയിൽ സിപിഎം സംസ്ഥാന നേതൃത്വം പ്രാഥമിക അന്വേഷണം നടത്തി. ഇടപാട് നടന്നിട്ടുണ്ട് എന്ന് സംസ്ഥാന നേതൃത്വത്തിന് ബോധ്യപ്പെട്ടുവെന്നാണ് സൂചന. വിവരം പാര്ട്ടി സംസ്ഥാന നേതൃത്വം കോഴിക്കോട് ജില്ലാ കമ്മിറ്റിയെ അറിയിച്ചിട്ടുണ്ട്.