ഡൽഹിയിൽ പുക ശ്വസിച്ച് ഒരു കുടുംബത്തിലെ നാലുപേർ മരിച്ചു
Wednesday, June 26, 2024 2:42 AM IST
ന്യൂഡൽഹി: ഡൽഹിയിൽ തീപിടിത്തത്തെ തുടർന്ന് പുക ശ്വസിച്ച് ഒരു കുടുംബത്തിലെ നാലുപേർ മരിച്ചു. ദ്വാരകയിലെ പ്രേം നഗർ ഏരിയയിലാണ് സംഭവം. ഇൻവെർട്ടറിൽ ഷോർട്ട് സർക്യൂട്ട് സംഭവിച്ചത് മൂലമാണ് തീപിടിത്തമുണ്ടായത്.
ഹീരാ സിംഗ് കക്കർ (48), ഭാര്യ നീതു (40), മക്കളായ റോബിൻ (22), ലക്ഷയ് (21) എന്നിവരാണ് മരിച്ചത്. പുലർച്ചെ 3.30 ഓടെയാണ് തീപിടിത്തത്തെക്കുറിച്ച് ഡിപ്പാർട്ട്മെന്റിനെ അറിയിച്ചതെന്നും രണ്ട് ഫയർ യൂണിറ്റുകൾ സംഭവസ്ഥലത്തേക്ക് അയച്ചതായും ഡൽഹി ഫയർ സർവീസസ് (ഡിഎഫ്എസ്) ഉദ്യോഗസ്ഥൻ പറഞ്ഞു.
രണ്ട് നിലകളുള്ള വീടിന്റെ ഒന്നാം നിലയിലാണ് തീ പിടിച്ചത്. അത് അടുത്തുള്ള സോഫയിലേക്ക് പടർന്നതാണ് അപകടത്തിന്റെ വ്യാപ്തി വർധിപ്പിച്ചത്. അകത്ത് നിന്ന് പൂട്ടിയ ഇരുമ്പ് ഗേറ്റ് മുറിച്ചാണ് രക്ഷാപ്രവർത്തകർ അകത്ത് പ്രവേശിച്ചത്.
അബോധാവസ്ഥയിലായവരെ റാവു തുലാറാം മെമ്മോറിയൽ ഹോസ്പിറ്റലിൽ എത്തിച്ചെങ്കിലും മരണം സംഭവിച്ചിരുന്നു. മൃതദേഹങ്ങൾ പോസ്റ്റ്മോർട്ടത്തിനായി മോർച്ചറിയിലേക്ക് മാറ്റി. ബന്ധപ്പെട്ട വകുപ്പുകൾ പ്രകാരം കേസ് രജിസ്റ്റർ ചെയ്തിട്ടുണ്ടെന്നും കൂടുതൽ അന്വേഷണം നടന്നുവരികയാണെന്നും പോലീസ് അറിയിച്ചു.