മന്ത്രി വി.ശിവൻകുട്ടിക്കെതിരെ കരിങ്കൊടി പ്രതിഷേധം ; കെഎസ്യു ജില്ലാ പ്രസിഡന്റ് അറസ്റ്റിൽ
Sunday, June 23, 2024 10:24 PM IST
തിരുവനന്തപുരം: വിദ്യാഭ്യാസ മന്ത്രി വി.ശിവൻകുട്ടിയെ കരിങ്കൊടി കാണിച്ച സംഭവത്തിൽ കെഎസ്യു തിരുവനന്തപുരം ജില്ലാ പ്രസിഡന്റ് ഗോപു നെയ്യാറിനെ പോലീസ് അറസ്റ്റ് ചെയ്തു.
വീട്ടിൽ നിന്നാണ് ഗോപുവിനെ പോലീസ് അറസ്റ്റ് ചെയ്തത്. പ്ലസ് വൺ സീറ്റ് പ്രതിസന്ധി പരിഹരിക്കണമെന്ന് ആവശ്യപ്പെട്ട് ഞായറാഴ്ച മന്ത്രിയുടെ ഔദ്യോഗിക വസതിക്കു മുന്പിൽ വച്ച് കെഎസ്യു പ്രവർത്തകർ വി.ശിവൻകുട്ടിയെ കരിങ്കൊടി കാണിച്ചിരുന്നു.
തുടർന്ന് പ്രവർത്തകർ മന്ത്രിയുടെ വാഹനത്തിൽ കരിങ്കൊടി കെട്ടി പ്രതിഷേധിച്ചു. അഞ്ച് മിനിറ്റോളം മന്ത്രിയുടെ വാഹനം റോഡിൽ തടഞ്ഞിട്ടശേഷമാണ് കെഎസ്യു പ്രവർത്തകരെ പോലീസ് മാറ്റിയത്.