പ്ലസ് വൺ ക്ലാസുകൾ തിങ്കളാഴ്ച ആരംഭിക്കും ; മൂന്നേകാൽ ലക്ഷം വിദ്യാർഥികൾ പ്രവേശനം നേടി
Sunday, June 23, 2024 8:14 PM IST
തിരുവനന്തപുരം: ഒന്നാം വർഷ ഹയർ സെക്കൻഡറി ക്ലാസുകൾ തിങ്കളാഴ്ച ആരംഭിക്കും. തിരുവനന്തപുരം കോട്ടൺഹിൽ സ്കൂളിൽ നാളെ രാവിലെ ഒന്പതിന് മന്ത്രി വി. ശിവൻകുട്ടിയുടെ നേതൃത്വത്തിൽ വിദ്യാർഥികളെ സ്വീകരിക്കും.
ഇത്രയും വേഗത്തിൽ പ്ലസ് വൺ ക്ലാസുകൾ ആരംഭിക്കാൻ കഴിഞ്ഞത് വിദ്യാഭ്യാസവകുപ്പിന്റെ വിശ്രമമില്ലാത്ത പ്രവർത്തനങ്ങളുടെ ഫലമായാണെന്ന് മന്ത്രി പറഞ്ഞു. 2076 സർക്കാർ എയ്ഡഡ്, അൺ എയ്ഡഡ് സ്കൂളുകളിലാണ് തിങ്കളാഴ്ച ക്ലാസുകൾ ആരംഭിക്കുന്നത്.
2023 ൽ ജൂലൈ അഞ്ചിനും 2022 ൽ ഓഗസ്റ്റ് 25 നുമാണ് ക്ലാസുകൾ ആരംഭിച്ചിരുന്നത്. ഏകദേശം മൂന്നേകാൽ ലക്ഷം വിദ്യാർഥികൾ സ്ഥിരപ്രവേശനം നേടിയ ശേഷമാണ് ക്ലാസുകൾ ആരംഭിക്കുന്നത്.
ഇനിയും അഡ്മിഷൻ ലഭിക്കാനുള്ളവർക്ക് സപ്ലിമെന്ററി അലോട്മെന്റ് സമയത്ത് അഡ്മിഷൻ ലഭിക്കുമെന്നും മന്ത്രി വ്യക്തമാക്കി.