മകളോട് മോശമായി പെരുമാറിയ ആളുടെ മൂക്ക് തകർത്തു; അമ്മക്കെതിരെ കേസെടുക്കില്ല
Saturday, June 22, 2024 9:59 PM IST
പത്തനംതിട്ട: മകളോട് മോശമായി പെരുമാറിയ ആളുടെ മൂക്ക് ഇടിച്ച് തകർത്ത സംഭവത്തിൽ അമ്മയ്ക്കെതിരെ പോലീസ് കേസെടുക്കില്ല. അമ്മയുടേത് സ്വയം പ്രതിരോധമായിരുന്നുവെന്ന നിഗമനത്തിലാണ് ഏനാത്ത് പോലീസ്.
ആക്രമിക്കാൻ വന്നപ്പോൾ അമ്മ സ്വയം പ്രതിരോധം തീർത്തുവെന്നും പ്രതി രാധാകൃഷ്ണപിള്ള അമ്മയെയും മകളെയും ആക്രമിച്ചുവെന്നും പോലീസ് പറയുന്നു. വെള്ളിയാഴ്ച വൈകുന്നേരമായിരുന്നു സംഭവം.
സ്കൂൾ വിട്ട് വീട്ടിലേക്ക് വരും വഴിയായിരുന്നു ബസിൽ വച്ച് വിദ്യാർഥിനിക്ക് മോശം അനുഭവം ഉണ്ടായത്. പെൺകുട്ടി ബസിൽ നിന്ന് ഇറങ്ങിയപ്പോഴും രാധാകൃഷ്ണപിള്ള ഉപദ്രവിക്കാൻ ശ്രമിച്ചിരുന്നു. തുടർന്ന് വിവരം വിദ്യാർഥിനി വീട്ടിൽ അറിയിക്കുകയായിരുന്നു.
കുട്ടി ഫോണിൽ വിളിച്ചത് അനുസരിച്ചാണ് അമ്മ അവിടെ എത്തിയത്. അപ്പോൾ അമ്മയ്ക്ക് നേരെയും ആക്രമണം ഉണ്ടായി. തുടർന്ന് പെൺകുട്ടിയുടെ അമ്മ രാധാകൃഷ്ണപിള്ളയുടെ മൂക്ക് അടിച്ചു തകര്ക്കുകയായിരുന്നു.