"കണക്കുകൾ വച്ച് മറുപടി പറയാം': സമരങ്ങൾ രാഷ്ട്രീയപ്രേരിതമെന്ന് മന്ത്രി വി. ശിവൻകുട്ടി
Saturday, June 22, 2024 11:49 AM IST
തിരുവനന്തപുരം: മലപ്പുറത്ത് പ്ലസ് വണ് സീറ്റിന്റെ കുറവ് 2954 എണ്ണം മാത്രമാണെന്ന് വിദ്യാഭ്യാസമന്ത്രി വി. ശിവൻകുട്ടി. അണ് എയ്ഡഡ് ഒഴികെ 11,083 സീറ്റുകള് ജില്ലയിൽ ഒഴിവുണ്ട്. ഇനി രണ്ട് അലോട്ട്മെന്റ് കൂടിയുണ്ടെന്നും മന്ത്രി പറഞ്ഞു.
പ്ലസ് വണ് സീറ്റിനെ ചൊല്ലിയുള്ള സമരങ്ങൾ രാഷ്ട്രീയപ്രേരിതമാണ്. ആദ്യ അലോട്ട്മെന്റ് കഴിയുമ്പോൾ തന്നെ സമരം തുടങ്ങി. സംഘർഷ സാഹചര്യം ഉണ്ടാക്കാനാണ് സമരം നടത്തുന്നവർ ശ്രമിക്കുന്നതെന്നും അദ്ദേഹം കുറ്റപ്പെടുത്തി.
കണക്കുകൾ വച്ച് സമരക്കാരോട് മറുപടി പറയാൻ തയാറാണെന്നും അദ്ദേഹം പറഞ്ഞു. മാധ്യമപ്രവർത്തകരുടെ ചോദ്യങ്ങൾക്ക് മറുപടിയായാണ് അദ്ദേഹം ഇക്കാര്യങ്ങൾ വ്യക്തമാക്കിയത്.