പ്രധാനമന്ത്രി ചെയ്തത് തന്നെയാണ് രാഹുല് ചെയ്യുന്നത്: പവന് ഖേര
Tuesday, June 18, 2024 6:42 PM IST
ന്യൂഡല്ഹി: രാഹുല് ഗാന്ധിക്കും കോണ്ഗ്രസ് പാര്ട്ടിക്കുമെതിരായ മുന് കേന്ദ്രമന്ത്രി രാജീവ് ചന്ദ്രശേഖറിന്റെ പരിഹാസത്തിന് മറുപടിയുമായി കോണ്ഗ്രസ് നേതാവ് പവന് ഖേര രംഗത്ത്. 2014-ല് പ്രധാനമന്ത്രി ചെയ്ത അതേകാര്യമാണ് രാഹുല് ചെയ്തതെന്ന് അദ്ദേഹം പറഞ്ഞു.
അന്നത്തെ ലോക്സഭ തെരഞ്ഞെടുപ്പില് വാരാണസി മണ്ഡലത്തില് മത്സരിക്കുന്ന കാര്യം പറയാതെയാണ് അദ്ദേഹം വഡോദരയില് സ്ഥാനാർഥിത്വം മത്സരിച്ചത്. ഇത്തരത്തിൽ നാണമില്ലാത്ത പ്രവര്ത്തി ചെയ്ത് മോദി വഡോദരയിലെ ജനങ്ങളെ വഞ്ചിച്ചയാളാണെന്നും പവന് ഖേര ആരോപിച്ചു.
കോണ്ഗ്രസ് പാര്ട്ടിക്ക് നാണമില്ലെന്നും കുടുംബത്തിലെ ഒരാള് മാറുമ്പോള് മറ്റൊരാള് വരുന്ന രീതിയാണ് അവര്ക്കുള്ളതെന്നും രാജീവ് കഴിഞ്ഞ ദിവസം പ്രതികരിച്ചിരുന്നു. രാഹുല് വയനാട് ലോക്സഭ സീറ്റ് ഒഴിയുകയും പ്രിയങ്ക ഗാന്ധി പകരം മത്സരിക്കാനെത്തുമെന്ന എഐസിസിയുടെ പ്രഖ്യാപനത്തിന് പിന്നാലെയായിരുന്നു രാജീവിന്റെ പ്രതികരണം.