ബാരാമതിയിൽ അജിത് പവാറിനെതിരേ യുഗേന്ദ്ര പവാറിനെ മത്സരിപ്പിക്കുമെന്ന് സൂചന
Thursday, June 13, 2024 7:18 AM IST
മുംബൈ: മഹാരാഷ്ട്ര നിയമസഭാ തെരഞ്ഞെടുപ്പില് ബാരാമതി മണ്ഡലത്തില് നിന്നും അജിത് പവാറിനെ നേരിടാന് യുഗേന്ദ്ര പവാറിനെ ശരദ് പവാര് രംഗത്തിറക്കുമെന്ന് റിപ്പോര്ട്ട്. അജിത് പവാറിന്റെ സഹോദരന് ശ്രീനിവാസ് പവാറിന്റെ മകനാണ് യുഗേന്ദ്ര പവാര്.
ബാരാമതി ലോക്സഭാ തെരഞ്ഞെടുപ്പ് ഫലം പുറത്ത് വന്നതിന് പിന്നാലെ ശരദ് പവാറിനൊപ്പം ബാരാമതിയില് ഒരു പൊതുപരിപാടിയില് യുഗേന്ദ്ര പങ്കെടുത്തിരുന്നു. ഈ സംഭവം ചൂണ്ടിക്കാണിച്ചാണ് പവാര് കുടുംബത്തില് നിന്നും മറ്റൊരാള് കൂടി രാഷ്ട്രീയ രംഗത്ത് ഇറങ്ങുന്നുവെന്ന സൂചനകൾ വരുന്നത്.
നേരത്തെ ലോക്സഭാ തെരഞ്ഞെടുപ്പിൽ ബാരാമതിയിൽ മത്സരിച്ച ശരദ് പവാറിന്റെ മകൾ സുപ്രിയ സുലെയുടെ തെരഞ്ഞെടുപ്പ് പ്രചാരണത്തിലും യുഗേന്ദ്ര സജീവമായി രംഗത്തുണ്ടായിരുന്നു. അജിത് പവാറിന്റെ ഭാര്യ സുനേത്ര പവാറിനെയാണ് സുപ്രിയ പരാജയപ്പെടുത്തിയത്.