ഭക്ഷ്യവിഷബാധ ശ്രദ്ധയിൽപ്പെട്ടാൽ കർശന നടപടിയെന്ന് തൃശൂർ ജില്ലാ കളക്ടർ
Wednesday, May 29, 2024 7:52 AM IST
തൃശൂര്: ജില്ലയില് ഭക്ഷ്യവിഷബാധ കേസുകളെ ശക്തമായി നേരിടുമെന്ന് കളക്ടര് വി.ആര്. കൃഷ്ണതേജ. കേസുകൾ കണ്ടെത്തിയാല് ഉടനെ തദ്ദേശസ്വയംഭരണം, ഫുഡ് സേഫ്റ്റി വകുപ്പുകള്ക്ക് റിപ്പോര്ട്ട് ചെയ്യാന് ആശുപത്രി അധികൃതര്ക്ക് കളക്ടർ നിര്ദേശം നൽകി.
ജില്ലയിലെ എല്ലാ റസ്റ്റോറന്റുകളിലും ഹോട്ടലുകളിലും ശുചിത്വവും ഗുണനിലവാരവും ഉറപ്പാക്കുന്നതിന് പ്രത്യേക പരിശോധനകളും തുടര് പരിശോധനകളും നടത്തും.
ജില്ലയിലെ പിഎച്ച്സി മുതലുള്ള ഏതെങ്കിലും ആശുപത്രികളിലെ ഡോക്ടര്മാര്ക്കോ മറ്റ് ജീവനക്കാര്ക്കോ ഭക്ഷ്യവിഷബാധയേറ്റതായി പരിശോധനയില് കണ്ടെത്തിയാല് അറിയിക്കാന് കളക്ടർ നിര്ദേശം നല്കി. ഇതിനായി തദ്ദേശസ്വയംഭരണം, ഫുഡ് സേഫ്റ്റി വകുപ്പുകളില് നോഡല് ഓഫീസറെ ചുമതലപ്പെടുത്തും.
തുടര്ന്ന് തദ്ദേശസ്ഥാപനങ്ങളിലെ എച്ച്ഐ, ഫുഡ് സേഫ്റ്റി ഉദ്യോഗസ്ഥര് അടിയന്തരമായി ബന്ധപ്പെട്ട പ്രദേശങ്ങളില് പരിശോധന നടത്തി നടപടി സ്വീകരിക്കുമെന്നും അദ്ദേഹം അറിയിച്ചു.