പെരുമ്പാവൂരിലെ നിയമവിദ്യാർഥിനി വധക്കേസ്: പ്രതിയുടെ അപ്പീലില് ഹൈക്കോടതി വിധി ഇന്ന്
Monday, May 20, 2024 12:31 PM IST
കൊച്ചി: പെരുമ്പാവൂരിൽ നിയമ വിദ്യാര്ഥിനിയെ ബലാല്സംഗം ചെയ്ത് കൊലപ്പെടുത്തിയ കേസില് വിചാരണക്കോടതി വിധിച്ച വധശിക്ഷയ്ക്കെതിരേ പ്രതി അമീറുള് ഇസ്ലാം നല്കിയ അപ്പീലില് ഹൈക്കോടതി ഇന്ന് വിധി പറയും. ഉച്ചയ്ക്ക് 1.45നാണ് ഡിവിഷന് ബെഞ്ച് കേസ് പരിഗണിക്കുന്നത്. ജസ്റ്റിസുമാരായ പി.ബി. സുരേഷ് കുമാര്, എസ്. മനു എന്നിവരടങ്ങിയ ഡിവിഷന് ബെഞ്ചാണ് വിധി പ്രസ്താവം നടത്തുന്നത്.
വധശിക്ഷയില്നിന്ന് മാത്രമല്ല കുറ്റവിമുക്തനാക്കി വെറുതെ വിടണമെന്നാണ് പ്രതിയുടെ ആവശ്യം. എന്നാല് വധശിക്ഷ നടപ്പാക്കാന് അനുമതി തേടി സംസ്ഥാന സര്ക്കാര് നല്കിയ ഹര്ജിയിലും ഇന്ന് ഉത്തരവുണ്ടാകും.
കൊലപാതകം, ബലാത്സംഗം, അതിക്രമിച്ചുകയറല്, മാരകമായി മുറിവേല്പ്പിക്കല് തുടങ്ങിയ കുറ്റങ്ങളാണ് ആസാം സ്വദേശിയായ അമിറുള് ഇസ്ലാമിനെതിരേ നേരത്തെ തെളിഞ്ഞത്. താന് കുറ്റം ചെയ്തിട്ടില്ലെന്നും പോലീസ് കെട്ടിച്ചമച്ച തെളിവുകളാണ് തനിക്കെതിരെ വിചാരണക്കോടതി പരിഗണിച്ചതെന്നുമാണ് പ്രതിയുടെ അപ്പീലിലെ വാദം.
2016 ഏപ്രില് 28നാണ് പെരുമ്പാവൂരില് നിയമ വിദ്യാര്ഥിനി കൊല്ലപ്പെട്ടത്.