ലോക്സഭാ തെരഞ്ഞെടുപ്പ് പ്രഖ്യാപിച്ചതായി വ്യാജപ്രചാരണം
Saturday, February 24, 2024 8:33 PM IST
ന്യൂഡൽഹി: ലോക്സഭാ തെരഞ്ഞെടുപ്പ് പ്രഖ്യാപിച്ചതായി സാമൂഹ്യമാധ്യമങ്ങളിൽ വ്യാജപ്രചാരണം. മാർച്ച് 12 മുതൽ തെരഞ്ഞെടുപ്പ് പെരുമാറ്റച്ചട്ടം നിലവിൽവരുമെന്നും 28 മുതൽ നാമനിർദ്ദേശ പത്രിക നൽകാമെന്നും ഏപ്രിൽ 19ന് തെരഞ്ഞെടുപ്പ് നടത്തുമെന്നും മേയ് 22ന് തെരഞ്ഞെടുപ്പ് ഫലം പുറത്തുവരുമെന്നും മേയ് 30ന് പുതിയ മന്ത്രിസഭ സത്യപ്രതിജ്ഞ ചെയ്യുമെന്നാണ് പ്രചരിക്കുന്നത്.
എന്നാൽ സാമൂഹ്യമാധ്യമങ്ങളിലെ പ്രചാരണത്തിന്റെ ഉറവിടം കണ്ടെത്താൻ കഴിഞ്ഞിട്ടില്ല. തെരഞ്ഞെടുപ്പിന്റെ മുന്നൊരുക്കങ്ങൾ വിലയിരുത്തുന്നതിന്റെ ഭാഗമായി തെരഞ്ഞെടുപ്പ് കമ്മീഷൻ ഉദ്യോഗസ്ഥർ ഇപ്പോൾ വിവിധ സംസ്ഥാനങ്ങളിൽ പര്യടനം നടത്തുകയാണ്.
മാർച്ച് മൂന്നാം ആഴ്ചയിൽ തെരഞ്ഞെടുപ്പ് പ്രഖ്യാപിച്ചേക്കുമെന്ന് സൂചനയുണ്ട്. മാർച്ച് പതിമൂന്നിന് മുന്പെ ഉദ്യോഗസ്ഥരുടെ പര്യടനം അവസാനിക്കൂ. തുടർന്ന് ഇവർ നൽകുന്ന റിപ്പോർട്ടിന്റെ അടിസ്ഥാനത്തിൽ തെരഞ്ഞെടുപ്പ് പ്രഖ്യാപിക്കും.
2019 ലെ ലോക്സഭാ തെരഞ്ഞെടുപ്പ് മാർച്ച് 10-നായിരുന്നു പ്രഖ്യാപിച്ചത്. ഏപ്രിൽ 11 മുതൽ മേയ് 19 വരെ ഏഴ് ഘട്ടങ്ങളിലായിട്ടായിരുന്നു തെരഞ്ഞെടുപ്പ് നടന്നത്. മേയ് 23-നായിരുന്നു ഫലപ്രഖ്യാപനം.