രാജ്കോട്ടിൽ ഇന്ത്യയ്ക്ക് രാജകീയ വിജയം
Sunday, February 18, 2024 5:22 PM IST
രാജ്കോട്ട്: ഇന്ത്യ-ഇംഗ്ലണ്ട് ടെസ്റ്റിൽ ഇന്ത്യയ്ക്ക് തകർപ്പൻ വിജയം. 434 റൺസിനാണ് ഇന്ത്യ ഇംഗ്ലണ്ടിനെ തകർത്തെറിഞ്ഞത്. 557 റൺസ് വിജയലക്ഷ്യം പന്തുടർന്ന ഇംഗ്ലണ്ട് 122 റൺസിനാണ് പുറത്തായത്. ഇതോടെ അഞ്ച് മത്സര പരമ്പരയില് ഇന്ത്യ 2-1 എന്ന നിലയിൽ മുന്നിലെത്തി.
റണ്സുകളുടെ അടിസ്ഥാനത്തില് ടെസ്റ്റിലെ ഇന്ത്യയുടെ എക്കാലത്തെയും വലിയ വിജയമാര്ജിനാണിത്. 1934നുശേഷം ഇംഗ്ലണ്ടിന്റെ ഏറ്റവും വലിയ തോല്വിയുമാണിത്. അഞ്ച് വിക്കറ്റ് വീഴ്ത്തിയ രവീന്ദ്ര ജഡേജയും രണ്ട് വിക്കറ്റ് വീഴ്ത്തി കുല്ദീപ് യാദവും ഓരോ വിക്കറ്റ് വീതം വീഴ്ത്തിയ ബുമ്രയും അശ്വിനും ചേര്ന്നാണ് ഇംഗ്ലണ്ടിനെ തകർത്തെറിഞ്ഞത്.
ഇന്ത്യക്കായി ഒരു മത്സരത്തില് അഞ്ച് വിക്കറ്റും സെഞ്ചുറിയും നേടുന്ന നാലാമത്തെ താരമാണ് രവീന്ദ്ര ജഡേജ. ഇത് രണ്ടാം തവണയാണ് ജഡേജ ഈ നേട്ടം സ്വന്തമാക്കുന്നത്. അശ്വിന് ശേഷം ഈ നേട്ടം ഒന്നില് കൂടുതല് തവണ സ്വന്തമാക്കുന്ന താരവും ജഡേജയാണ്.