കോണ്‍ഗ്രസില്‍ ഗ്രൂപ്പ് രാഷ്ട്രീയം അതിരുവിട്ടു, താന്‍ പാര്‍ട്ടി വിട്ടെന്ന പരാമര്‍ശം സുധാകരന് തിരുത്തേണ്ടി വരും: സുധീരന്‍
Sunday, December 31, 2023 4:13 PM IST
തിരുവനന്തപുരം: കോണ്‍ഗ്രസ് നേതൃത്വത്തിനെതിരേ വീണ്ടും ആഞ്ഞടിച്ച് മുതിര്‍ന്ന നേതാവ് വി.എം.സുധീരന്‍. കേരളത്തിലെ കോണ്‍ഗ്രസില്‍ ഗ്രൂപ്പ് രാഷ്ട്രീയം അതിരുവിട്ടെന്ന് സുധീരന്‍ പറഞ്ഞു.
കെപിസിസി പ്രസിഡന്‍റായി കെ.സുധാകരനും പ്രതിപക്ഷനേതാവായി വി.ഡി.സതീശനും ചുമതലയേറ്റപ്പോള്‍ അവരെ സ്വാഗതം ചെയ്ത ആളാണ് താന്‍. ഏറെക്കാലമായി കോണ്‍ഗ്രസിലുണ്ടായിരുന്ന ഗ്രൂപ്പ് അധിഷ്ഠിതമായ സംഘടനാശൈലിക്ക് മാറ്റം വരുമെന്നാണ് താന്‍ പ്രതീക്ഷിച്ചിരുന്നത്.
എന്നാല്‍ ആദ്യ ആലോചനാ യോഗത്തില്‍തന്നെ മുന്‍ പ്രസിഡന്‍റുമാരെ ഒഴിവാക്കി. ഇതില്‍ കെ.മുരളീധരന്‍ മാത്രമാണ് വിയോജിപ്പ് പ്രകടിപ്പിച്ചത്. ഏകപക്ഷീയമായാണ് ഡിസിസി പ്രസിഡന്‍റുമാരെ നിയമിച്ചത്. ഇതിനെതിരേ ഫേസ്ബുക്കില്‍ പോസ്റ്റിട്ടപ്പോള്‍ സുധാകരന് തന്നെ കാണാന്‍ വന്നു.
ഈ രീതി ശരിയല്ലെന്നും കൂട്ടായ ചര്‍ച്ച വേണമെന്നും അന്ന് പറഞ്ഞതാണ്. എന്നാല്‍ സുധാകരന് അടക്കമുള്ളവരുടെ നിലപാടില്‍ ഒരു മാറ്റവും ഉണ്ടായില്ല. ഈ ശൈലി പാര്‍ട്ടിക്ക് ഗുണം ചെയ്യില്ലെന്ന് കണ്ടതോടെയാണ് ഹൈക്കമാന്‍ഡിന് പരാതി അയച്ചത്.
പ്രശ്‌നങ്ങള്‍ക്ക് പരിഹാരമുണ്ടാകുമെന്ന് താരിഖ് അന്‍വറും രാഹുല്‍ ഗാന്ധിയും തന്നോട് പറഞ്ഞു. എന്നാല്‍ നിര്‍ഭഗ്യവശാല്‍ ഗ്രൂപ്പുരാഷട്രീയം വിപുലമാവുകയാണ് ചെയ്തതെന്നും സുധീരന്‍ പറഞ്ഞു.
താന്‍ പാര്‍ട്ടി വിട്ടെന്ന് സുധാകരന് പറഞ്ഞത് ശരിയല്ല. അങ്ങനെ താന്‍ സുധാകരനോട് പറഞ്ഞിട്ടില്ല. സുധാകരന് പറഞ്ഞത് പലതും പിന്നീട് തിരുത്തിയിട്ടുണ്ട്. ഇതും തിരുത്തേണ്ടി വരുമെന്നും സുധീരന്‍ കൂട്ടിച്ചേര്‍ത്തു. കെപിസിസി യോഗത്തില്‍ താന്‍ ഉയര്‍ത്തിയ വിമര്‍ശനങ്ങള്‍ക്ക് മറുപടി പറയേണ്ടത് അവിടെവച്ചായിരുന്നെന്നും സുധീരന്‍ വ്യക്തമാക്കി.
2016ലെ നിയമസഭാ തെരഞ്ഞെടുപ്പില്‍ ഗ്രൂപ്പ് നോക്കാതെ മെറിറ്റിന്‍റെ അടിസ്ഥാനത്തില്‍ കോണ്‍ഗ്രസ് സ്ഥാനാര്‍ഥികളെ നിശ്ചയിച്ചിരുന്നെങ്കില്‍ തെരഞ്ഞെടുപ്പ് ഫലം വ്യത്യസ്തമാകുമായിരുന്നെന്നും സുധീരന്‍ തുറന്നടിച്ചു. സ്ഥാനാര്‍ഥി നിര്‍ണയം കഴിഞ്ഞിട്ടെങ്കിലും ഗ്രൂപ്പുകള്‍ പരസ്പരമുള്ള പോര് അവസാനിപ്പിച്ചിരുന്നെങ്കിലും കോണ്‍ഗ്രസ് വലിയ വിജയം നേടുമായിരുന്നെന്നും അദ്ദേഹം പ്രതികരിച്ചു.