കണ്ടല ബാങ്ക്: ഭാസുരാംഗനും മകനും വീണ്ടും ഇഡി സമൻസ്
Tuesday, November 14, 2023 5:48 PM IST
തിരുവനന്തപുരം: കണ്ടല ബാങ്ക് കള്ളപ്പണക്കേസിൽ സിപിഐ നേതാവും ബാങ്കിന്റെ മുൻ പ്രസിഡന്റുമായ എൻ. ഭാസുരാംഗനു വീണ്ടും ഇഡി സമൻസ്. ബുധനാഴ്ച ഇഡി ഓഫീസിൽ ഹാജരാകാൻ ആവശ്യപ്പെട്ടാണ് നോട്ടീസ്.
ഭാസുരാംഗന്റെ മകൻ അഖിൽ ജിത്തും ബുധനാഴ്ച ഹാജരാകണം. തിങ്കളാഴ്ച ഇഡി എട്ട് മണിക്കൂറോളം ഭാസുരാംഗനെ ചോദ്യം ചെയ്തിരുന്നു. ഭാസുരാംഗൻ പ്രസിഡന്റായിരുന്ന കണ്ടല ബാങ്കിൽ 101 കോടി രൂപയുടെ ക്രമക്കേട് നടന്ന സംഭവത്തിലാണ് ഇഡി അന്വേഷണം.
കേസുമായി ബന്ധപ്പെട്ട് നേരത്തെ തിരുവനനന്തപുരത്തെ ബാങ്കിലും ഭാസുരാംഗന്റെ വീട്ടിലും ഇഡി പരിശോധന നടത്തി രേഖകൾ കസ്റ്റഡിയിലെടുത്തിരുന്നു. ഭാസുരാംഗന്റെ മകന് അഖിൽ ജിത്തിന്റെ നിക്ഷേപം, സാമ്പത്തിക സ്രോതസ്, ബിസിനസ് എന്നിവ സംബന്ധിച്ച രേഖകളും കഴിഞ്ഞ ദിവസം ഇഡി ശേഖരിച്ചിരുന്നു.