ഉന്നത വിദ്യാഭ്യാസ മേഖലയില് നടക്കുന്നത് മികവാര്ന്ന പ്രവര്ത്തനം: മന്ത്രി ആര്. ബിന്ദു
Monday, August 14, 2023 8:55 PM IST
തിരുവനന്തപുരം: ഉന്നത വിദ്യാഭ്യാസ മേഖലയില് മികവാര്ന്ന പ്രവര്ത്തനമാണ് സംസ്ഥാനത്ത് നടന്നുവരുന്നതെന്ന് ഉന്നത വിദ്യാഭ്യാസ മന്ത്രി ഡോ. ആര്. ബിന്ദു.
ഉന്നത വിദ്യാഭ്യാസ മേഖലയില് മികച്ച അടിസ്ഥാന വികസനമാണ് സര്ക്കാര് യാഥാർഥ്യമാക്കുന്നത്. കേന്ദ്ര-സ്ഥാന സര്ക്കാരുകള് സംയുക്തമായി നടത്തുന്ന റൂസ സ്കീം വഴി 568 കോടി രൂപയാണ് സംസ്ഥാനത്തെ കലാലയങ്ങളുടെ വികസനത്തിന് ചെലവഴിക്കുന്നത്.
കിഫ്ബി വഴി 1000 കോടി രൂപയുടെ അടിസ്ഥാന സൗകര്യവികസന പദ്ധതികളാണ് ഉന്നത വിദ്യാഭ്യാസ മേഖലയില് നടപ്പിലാക്കുന്നത്. ഇതിന് പുറമെ പ്ലാന് ഫണ്ടും വിനിയോഗിക്കുന്നുണ്ട്. ഇവയെല്ലാം വലിയ മാറ്റങ്ങളാണ് ഉന്നത വിദ്യാഭ്യാസ രംഗത്ത് സാധ്യമായിരിക്കുന്നത്.
ഭൗതിക സാഹചര്യങ്ങള് വികസിപ്പിക്കുന്നതോടൊപ്പം കരിക്കുലവും നവീകരിക്കുകയാണ്. തൊഴിലും വിദ്യാഭ്യാസവുമായുള്ള അന്തരം കുറച്ചുകൊണ്ടുവരാന് അസാപ്, ഇന്ക്യുബേഷന് സെന്ററുകള് ഉള്പ്പെടെയുള്ള നൂതന സൗകര്യങ്ങള് വിദ്യാര്ഥികള്ക്കായി ഒരുക്കിയിട്ടുണ്ട്.
ലോകോത്തര നിലവാരത്തിലുള്ള വിദ്യാഭ്യാസം ലഭ്യമാക്കുക എന്നതാണ് സര്ക്കാര് നയമെന്നും മന്ത്രി കൂട്ടിച്ചേർത്തു.