ബിജെപിക്ക് അധ്യക്ഷനെ കണ്ടെത്താനാകുന്നില്ലെന്ന് അഖിലേഷ്; തെരഞ്ഞെടുപ്പ് കുടുംബത്തില്‍നിന്നല്ലെന്ന് അമിത് ഷാ
Thursday, April 3, 2025 2:06 AM IST
ന്യൂഡല്‍ഹി: ചൂടേറിയ വഖഫ് ബില്‍ ചര്‍ച്ചയ്ക്കിടെ ലോക്‌സഭയില്‍ ചിരി പടര്‍ത്തി അഖിലേഷ് യാദവ്-അമിത് ഷാ സംവാദം. ബിജെപി പ്രസിഡന്‍റ് നിയമനവുമായി ബന്ധപ്പെട്ട് സമാജ്‌വാദി പാര്‍ട്ടി നേതാവ് അഖിലേഷ് യാദവ് നടത്തിയ പരാമര്‍ശമാണു സഭയിലാകെ ചിരി പടർത്തിയ സംവാദത്തിലേക്കു നയിച്ചത്.
ഇന്ത്യയിലെ ഏറ്റവും വലിയ രാഷ്‌ട്രീയ പാര്‍ട്ടി എന്ന് അവകാശപ്പെടുന്ന പാര്‍ട്ടിക്ക് സ്വന്തമായൊരു അധ്യക്ഷന്‍ ഇല്ലെന്നായിരുന്നു പരിഹാസച്ചിരിയോടെയുള്ള അഖിലേഷ് യാദവിന്‍റെ പരാമര്‍ശം. ഇതിന് മറുപടി പറയാന്‍ എഴുന്നേറ്റ ബിജെപി നേതാവ് അമിത് ഷായ്ക്കും ചിരി നിയന്ത്രിക്കാന്‍ കഴിഞ്ഞിരുന്നില്ല.
“അഖിലേഷ് ജി നിറഞ്ഞ ചിരിയോടെ ഒരു പരാമര്‍ശം നടത്തി. ഞാനും അതേ രീതിയില്‍ പ്രതികരിക്കും. ഈ സഭയില്‍ നമ്മുടെ എതിര്‍വശത്ത് ഇരിക്കുന്ന പാര്‍ട്ടികളുടെയെല്ലാം ദേശീയ പ്രസിഡന്‍റുമാര്‍ അഞ്ചു കുടുംബങ്ങളില്‍നിന്നു മാത്രം തെരഞ്ഞെടുക്കപ്പെട്ടവരാണ്. എന്നാല്‍, ബിജെപിയില്‍ അങ്ങനെയല്ല. പാര്‍ട്ടിയില്‍ 12-13 കോടി അംഗങ്ങളുണ്ട്. അതിലൊരാളാകണം അധ്യക്ഷന്‍. അതിനാല്‍ സ്വാഭാവികമായും സമയമെടുക്കും” - എന്നായിരുന്നു അമിത് ഷായുടെ മറുപടി.
“നിങ്ങളുടെ കാര്യംതന്നെയെടുക്കാം. നിങ്ങള്‍ക്ക് അധികം സമയം വേണ്ടിവരില്ല. നിങ്ങള്‍തന്നെ അടുത്ത 25 വര്‍ഷവും പാര്‍ട്ടിയുടെ പ്രസിഡന്‍റായി തുടരും” - ചിരിച്ചുകൊണ്ട് അമിത് ഷാ കൂട്ടിച്ചേർത്തു.
ജെ.പി. നഡ്ഡ കേന്ദ്രമന്ത്രിയായി ചുമതലയേറ്റതോടെ ബിജെപി ദേശീയ അധ്യക്ഷപദവി പത്തു മാസമായി ഒഴിഞ്ഞുകിടക്കുകയാണ്. ഇക്കാര്യമായിരുന്നു അഖിലേഷ് യാദവ് ചൂണ്ടിക്കാട്ടിയത്.