ഫാത്തിമഗിരി സോഷ്യല്‍ സര്‍വീസ് സെന്‍ററിന്‍റെ പ്രവര്‍ത്തനങ്ങള്‍ ശ്രദ്ധേയം
നിലമ്പൂര്‍: ഫാത്തിമഗിരി സോഷ്യല്‍ സര്‍വീസ് സെന്‍ററിന്‍റെ നേതൃത്വത്തില്‍ അയക്കൂട്ട സംഗമവും ആദരിക്കല്‍ ചടങ്ങും വിവിധ പദ്ധതികളുടെ പ്രഖ്യാപനവും നടത്തി. ചടങ്ങിന്‍റെ ഭാഗമായി സംഘടിപ്പിച്ച ഗോത്രകലാകാരന്‍മാരുടെ പരുന്താട്ടവും വീട്ടമ്മമാരുടെ മാര്‍ഗംകളിയും തിരുവാതിരയും ഫ്യൂഷന്‍ ഡാന്‍സും സംഗമത്തില്‍ അരങ്ങേറി. നിലമ്പൂര്‍ ഫാത്തിമഗിരി സോഷ്യല്‍ സര്‍വീസ് സെന്‍റര്‍ ഡയറക്ടര്‍ സിസ്റ്റര്‍ മരീനിയുടെ നേതൃത്വത്തിലാണ് അയല്‍ക്കൂട്ട സംഗമം നടത്തിയത്.
സ്കൂള്‍ സ്റ്റേഡിയത്തില്‍ നടന്ന സംഗമം പ്രൊവിന്ഷ്യല് സുപ്പീരിയര്‍ ഫാ. പോള്‍ ചെറുകോടുത്ത് ഉദ്ഘാടനം ചെയ്തു. സ്ത്രീ ശാക്തികരണ രംഗത്തും വനിതകള്‍ക്ക് സ്വയംതൊഴില്‍ കണ്ടെത്തുന്നതിനും ഉള്‍പ്പെടെ പ്രവര്‍ത്തിച്ചു വരുന്ന ഫാത്തിമഗിരി സോഷ്യല്‍ സര്‍വീസ് സെന്‍ററിന്‍റെ പ്രവര്‍ത്തനങ്ങള്‍ മാതൃകാപരമാണെന്നും അദ്ദേഹം പറഞ്ഞു.
ഒന്നര പതിറ്റാണ്ടായി ഫാത്തിമഗിരി സോഷ്യല്‍ സര്‍വീസ് സെന്‍ററിന്‍റെ ഡയറക്ടറായി പ്രവര്‍ത്തിക്കുന്ന സിസ്റ്റര്‍ മരീനിയുടെ പ്രവര്‍ത്തന മികവിനെയും ഫാ. പോള്‍ ചെറുകോടുത്ത് അഭിനന്ദിച്ചു. പ്രൊവിന്ഷ്യല് സുപ്പീരിയര്‍ സിസ്റ്റര്‍ മരിയ ജസീന അധ്യക്ഷത വഹിച്ചു. കണ്ണൂര്‍ രൂപത വികാരി ജനറാള്‍ ഡോ. ഫാ. ക്ലാരന്‍സ് പാലിയേറ്റ് മുഖ്യപ്രഭാഷണം നടത്തി.
ഫാ. ജോണ്‍സണ്‍ തേക്കടയില്‍ ആമുഖ പ്രഭാഷണം നടത്തി. വൈദികരംഗത്ത് 25 വര്‍ഷം പൂര്‍ത്തീകരിച്ച ഫാ. റോയ് കണ്ണന്‍ചിറ, ഫാത്തിമ ഗിരി സോഷ്യല്‍ സര്‍വീസ് സെന്‍റര്‍ ഡയറക്ടര്‍ സിസ്റ്റര്‍ മരീനി, ഡോ. സിസ്റ്റര്‍ ജൂലിറ്റ്, ഡോ. സിസ്റ്റര്‍ ട്രീഷ പാലക്കല്‍, കെസിബിസിയുടെ അധ്യാപക അവാര്‍ഡ് ജേതാവ് ഷേര്‍ളി മോള്‍, അങ്കണവാടി അധ്യാപികമാരായ സൗദാബി, പ്രഭ, മാധ്യമ പ്രവര്‍ത്തകന്‍ ലാല്‍ജോസ് എന്നിവരെയും ചടങ്ങില്‍ ആദരിച്ചു.
സിസ്റ്റര്‍മാരായ ഷീന, ജോവിറ്റ, ആന്‍ തേജ്സ്, നിതിഷാ, ഡോ. രേവതി, ഫാ. ജോര്‍ജ് തേനാടികുളം, തോമസ്കുട്ടി ചാലിയാര്‍, ലിസി ജോസഫ് എന്നിവര്‍ പ്രസംഗിച്ചു.