2020ൽ മാനത്ത് "ഉൽക്കാവർഷ'മുണ്ടാകും

Sunday, July 22, 2018 9:44 AM IST

2020 ഉൽക്കാവർഷമുണ്ടാകുമെന്ന് പ്രഖ്യാപിച്ച് ജാപ്പനീസ് സ്റ്റാർട്ടപ്പായ എഎൽഇ. ലോകത്തിലെ ആദ്യ കൃത്രിമ ഉൽക്കാവർഷ സംവിധാനമാണ് തങ്ങൾ തയാറാക്കുന്നതെന്നാണ് ടോക്കിയോ ആസ്ഥാനമായുള്ള കമ്പനി അവകാശപ്പെടുന്നത്. 2020ൽ ഹിരോഷിമയുടെ മുകളിൽ തങ്ങൾ ഉൽക്കാവർഷം നടത്തുമെന്നും കമ്പനി അവകാശപ്പെട്ടു.

രണ്ടു മൈക്രോ ഉപഗ്രഹങ്ങൾ അവസാനഘട്ട നിർമാണത്തിലാണ്. ഈ ഉപഗ്രഹങ്ങൾ ബഹിരാകാശത്തുന്നിന് ചെറിയ ബോളുകൾ ഭൂമിയിലേക്കു വിക്ഷേപിക്കും. ഭൂമിയുടെ അന്തരീക്ഷത്തിലേക്ക് ഈ ബോളുകൾ പ്രവേശിക്കുന്പോൾ അവ സ്വമേധയാ കത്തും. ഇത് ഉൽക്കാവർഷമായി ഭൂമിയിലുള്ളവർക്കു കാണാനാകും.

ഈ സംവിധാനത്തിലെ ആദ്യ ഉപഗ്രഹം വിക്ഷേപണത്തിന് തയാറായിട്ടുണ്ട്. അടുത്ത വർഷം മാർച്ചിൽ ജപ്പാന്‍റെ സ്പേസ് ഏജൻസിയുടെ സഹായത്തോടെ ഈ ഉപഗ്രഹം വിക്ഷേപിക്കും. രണ്ടാമത്തെ റോക്കറ്റ് 2019 പകുതിയോടെ സ്വകാര്യ റോക്കറ്റ് ഏജൻസിയുടെ സഹായത്തോടെ വിക്ഷേപിക്കാനാണ് തീരുമാനം.

ലോകം മുഴുവനും ലക്ഷ്യംവച്ചാണ് തങ്ങൾ ഇത്തരത്തിലൊരു സംരംഭം തുടങ്ങുന്നത്. ലോകത്തെവിടെയും കൃത്രിമ ഉൽക്കാവർഷം നടത്താനാകും- എഎൽഇ സിഇഒ ലെന ഒകജിമ പറഞ്ഞു.

ഓരോ ഉപഗ്രഹത്തിനും പ്രത്യേക രാസക്കൂട്ടുകളുള്ള 400 ചെറിയ ബോളുകൾ വഹിക്കാനുള്ള ശേഷിയുണ്ട്. ബോളുകളിൽ ഉപയോഗിച്ചിരിക്കുന്ന രാസപദാർഥങ്ങൾ എന്തെന്നുള്ളത് രഹസ്യമായിരിക്കുമെന്നും അദ്ദേഹം പറഞ്ഞു. 20-30 പരിപാടികൾക്ക് ഈ 400 ബോളുകൾ മതിയാകുമെന്നാണ് കമ്പനി അവകാശപ്പെടുന്നത്. രണ്ടു വർഷംവരെയാണ് ഈ ഉപഗ്രഹങ്ങളുടെ കാലാവധി.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.