കസ്റ്റഡിയിലിരിക്കെ രണ്ടാമത്തെ ഉത്തരവിറക്കി കേജരിവാൾ : Deepika.com National News |

ന്യൂഡൽഹി: ഇഡി കസ്റ്റഡിയിലിരിക്കെ രണ്ടാമത്തെ സർക്കാർ ഉത്തരവിറക്കി ഡൽഹി മുഖ്യമന്ത്രി അരവിന്ദ് കേജരിവാൾ. ആദ്യ ഉത്തരവിറക്കി രണ്ടു ദിവസത്തിനുശേഷമാണ് ആരോഗ്യമേഖലയുമായി ബന്ധപ്പെട്ട അടുത്ത ഉത്തരവിറക്കിയത്.

കസ്റ്റഡിയിലിരിക്കെ ജലവിഭവ വകുപ്പുമായി ബന്ധപ്പെട്ട് ഞായറാഴ്ചയാണ് ആദ്യ ഉത്തരവ് കേജരിവാൾ ഇറക്കിയത്. ഉത്തരവ് നൽകിയത് എങ്ങനെയാണെന്ന കാര്യം വ്യക്തമല്ലെന്നും ഇതുമായി ബന്ധപ്പെട്ട് അന്വേഷണം നടത്തുമെന്നും ഇഡി അറിയിച്ചു.

മാർച്ച് പോലീസ് തടഞ്ഞു

അതേസമയം, അരവിന്ദ് കേജരിവാളിന്‍റെ അറസ്റ്റിൽ പ്രതിഷേധിച്ച് ആം ആദ്മി പാർട്ടി പ്രവർത്തകർ പ്രധാനമന്ത്രി നരേന്ദ്ര മോദിയുടെ വസതിയിലേക്കു നടത്തിയ മാർച്ച് പോലീസ് തടഞ്ഞു. മാർച്ചിനെത്തുടർന്ന് പ്രധാനമന്ത്രിയുടെ വസതിക്കു സമീപം നിരോധനാജ്ഞ ഏർപ്പെടുത്തി. ഉപരോധം നടത്താനായി എത്തിയ പ്രവർത്തകരെ മെട്രോ സ്റ്റേഷനിൽനിന്ന് പോലീസ് അറസ്റ്റ് ചെയ്തു നീക്കി.

വനിതകൾ അടക്കമുള്ള നേതാക്കളെയും പ്രവർത്തകരെയും പോലീസ് ബസുകളിലേക്ക് വലിച്ചിഴച്ചു കയറ്റി. പാർട്ടിയുടെ ലോക്സഭാ സ്ഥാനാർഥികളെയും പോലീസ് തടഞ്ഞുവച്ചു. ന്യൂഡൽഹി പട്ടേൽ ചൗക്കിൽ പ്രവർത്തകരെ തടഞ്ഞ പോലീസ് ബലമായി ബസിൽ കയറ്റിക്കൊണ്ടു പോയി.