സൈക്കിൾ ചിഹ്നം: തെരഞ്ഞെടുപ്പു കമ്മീഷന്‍റെ പ്രഖ്യാപനം ഇന്ന് : Deepika.com National News |

Click here for detailed news of all items

സൈക്കിൾ ചിഹ്നം: തെരഞ്ഞെടുപ്പു കമ്മീഷന്‍റെ പ്രഖ്യാപനം ഇന്ന്

Sunday, January 15, 2017 11:24 AM IST

ലക്നോ: ഉത്തർപ്രദേശിൽ സമാജ്‌വാദി പാർട്ടിയുടെ സൈക്കിൾ ചിഹ്നം ആർക്കു ലഭിക്കുമെന്ന് ഇന്നറിയാം. പാർട്ടി ചിഹ്നത്തിനുവേണ്ടി മുലായം സിംഗ് യാദവും മുഖ്യമന്ത്രി അഖിലേഷ് യാദവും അവകാശവാദമുന്നയിച്ചതോടെയാണ് കമ്മീഷൻ ഇടപെട്ടത്. ചിഹ്നം മരവിപ്പിച്ചാലുള്ള തുടർനടപടികളെക്കുറിച്ചു ചർച്ച ചെയ്യാൻ അഖിലേഷിന്‍റെയും മുലായത്തിന്‍റെയും അണികൾ ഇന്നു പ്രത്യേകം യോഗം ചേരും.

സമാജ്‌വാദി പാർട്ടി സ്ഥാപിതമായിട്ട് 50 വർഷം തികയുന്ന വേളയിലാണു പാർട്ടി ചിഹ്നത്തെച്ചൊല്ലി അച്ഛനും മകനും കലഹിക്കുന്നത്. പാർട്ടി ചിഹ്നം പ്രചരിപ്പിക്കാൻ മുലായം സൈക്കിളിൽ സഞ്ചരിച്ചിട്ടുണ്ട്. എട്ടു ലക്ഷം സൈക്കിളുകൾ വിതരണം ചെയ്യാനുള്ള അഖിലേഷിന്‍റെ തീരുമാനം ഉടൻ നടപ്പാകില്ല.

ഇതിനിടെ, ഉത്തർപ്രദേശ് നിയമസഭാ തെരഞ്ഞെടുപ്പിലേക്കുള്ള പാർട്ടിയുടെ മുന്നൊരുക്കങ്ങൾക്കായി നേതാക്കളായ മുലായവും ശിവ്പാലും ഇന്നലെ കൂടിക്കാഴ്ച നടത്തി. മുലായത്തിനെതിരേ കോൺഗ്രസ് എംപി കപിൽ സിബലിനെ നിർത്തുമെന്ന അഭ്യൂഹം പരന്നിരുന്നു. രാജ്യസഭാ തെരഞ്ഞെടുപ്പിൽ കപിലിനെ എസ്പി പിന്തുണച്ച കാര്യം സൂചിപ്പിച്ച മുലായം, അഖിലേഷ് പാർട്ടിയെ നശിപ്പിക്കുകയാണെന്നും കുറ്റപ്പെടുത്തി.
നിയമസഭാ തെരഞ്ഞെടുപ്പിലെ 397 മത്‌സരാർഥികളുടെ ലിസ്റ്റ് മുലായവും 235 മത്‌സരാർഥികളുടെ ലിസ്റ്റ് അഖിലേഷും പുറത്തിറക്കിയിരുന്നു.

ഇതിനിടെ, ലോക്ദൾ പാർട്ടി ഏറ്റെടുക്കാമെന്ന് മുലായത്തിനു പാർട്ടി അധ്യക്ഷൻ സുനിൽ സിംഗ് വാഗ്ദാനം ചെയ്തു. മുൻ പ്രധാനമന്ത്രി ചൗധരി ചരൺ സിംഗാണു ലോക്ദൾ പാർട്ടിയുടെ സ്ഥാപകൻ. സൈക്കിൾ ചിഹ്നം നഷ്ടമായാൽ മുലായത്തിനു ലോക്ദളിന്‍റെ കലപ്പയേന്തിയ കർഷകന്‍റെ ചിഹ്നംകൊണ്ടു തൃപ്തിപ്പെടേണ്ടിവരും.സൈക്കിൾ ചിഹ്നം നഷ്ടമായാൽ അഖിലേഷ് മോട്ടോർസൈക്കിൾ ചിഹ്നം പ്രഖ്യാപിക്കുമെന്നും അറിയുന്നു.

Follow deepika.com on Twitter , Facebook and on YouTube , and stay in the know with what's happening in the world around you – in real time.

Deepika.com shall remain free of responsibility for what is commented below. However, we kindly request you to avoid defaming words against any religion, institutions or persons in any manner.